رمضان بازاراں وچ چینی خریدن والیاں دیاں لائناں ختم کرن دا حکم

لہور( پنجابی میڈیا گروپ)ہائیکورٹ نے رمضان بازاراں وچ چینی دے خریداراں دی لمبی لائناں تے اظہار برہمی کیتا اے۔ عدالت نے رمضان بازاراں توں چینی دے خریداراں دی لائناں ختم کرن دا حکم دیندیاں اج رپورٹ طلب کر لئی۔ کین کمشنر، ڈی جی انڈسٹری سمیت دوجے افسران عدالت وچ پیش ہوئے۔جسٹس شاہد جمیل خان نے ریمارکس دتے حکومت نے جو آکھیا اوہی قیمت مقرر کروا دتی پر ہن چینی دی دکاناں تے لوکاں دی لائناں کیوں لگوائی جا رہیاں نیں۔ عام خریدار نوں 85روپے قیمت نال چینی کیوں نہیں مل رہی، تسیں لوکاں نوں بھکاری بنا دتا۔ سرکاری وکیل نے آکھیا جی بالکل لوکاں نوں 85روپے وچ چینی مل رہی اے، عام دکاناں وچ 85جد کہ رمضان بازاراں وچ 65روپے سبسڈی تے چینی مل رہی اے، رمضان بازاراں وچ 15روپے دی سبسڈی دتی جا رہی اے۔ عدالت نے آکھیا جے گل وکھری ہوئی تے لاء افسر صاحب تہاڈے خلاف توہین عدالت دی کاروائی کراں گا، 15روپے دے پچھے تسیں عوام نوں بھکاری بنا دتا اے، رمضان بازاراں وچ چینی دی خریداری لئی لمبی لمبی لائن نہیں لگنی چاہیدی، ایتھے عدالت وچ حلف نامہ جمع کراؤ کہ لائناں نہیں لگن گیاں۔سرکاری وکیل نے جواب دتا یوٹیلیٹی تے دوجے سٹوراں تے لائناں نہیں لگدیاں، رمضان بازاراں وچ سٹالز دے لگن دی وجہ توں لائناں لگدیاں نیں۔ عدالت نے ریمارکس دتے انسانی حقوق دی خلاف ورزی ہو رہی اے، جے انسانی وقار متاثر کرنا اے تے کسے دے گھر دے باہر توں چینی لین دیو۔