اپوزیشن نے ناخوشگوار واقعہ اُتے سیاست چمکان دی کوشش کیتی: عثمان بزدار

لہور( پنجابی میڈیا گروپ)وزیراعلیٰ عثمان بزدار نے آکھیا اے بدقسمتی نال اپوزیشن دی بعض جماعتاں نے حالیہ ناخوشگوار واقعہ تے وی سیاست چمکان دی کوشش کیتی، اپوزیشن رہنماواں نے معاملے نوں سلجھان دی بجائے وگاڑن دی پوری کوشش کیتی۔ وزیراعلیٰ پنجاب عثمان بزدار نے اپنے بیان وچ آکھیا اے اپوزیشن جماعتاں دا منفی رویہ قابل مزمت اے، اپوزیشن ولوں اگ تے تیل چھڑکن دے مذموم عزائم بری طرح نکام رہے، نازک مرحلے تے اپوزیشن نے منفی کردار ادا کیتا، جدوں قوم نوں متحد کرن دی لوڑ سی اوس ویلے اپوزیشن قوم نوں تقسیم کر رہی سی۔ اوہناں دا کہنا سی کہ اپوزیشن دا ایہ غیر ذمہ دارانہ رویہ تاریخ وچ ہمیشہ برے لفظاں وچ یاد رکھیا جائے گا، پاک دھرتی ساڈے توں اتحاد، اتفاق دا تقاضا کر رہی اے، وطن دی مٹی دا ایہ فرض اتارنا سبھ تے واجب اے۔ عثمان بزدار آکھیا نبی پاکؐ دی شان اقدس نوں لفظاں وچ بیان کرنا ممکن نہیں۔