نواز شریف علاج توں بغیر پاکستان گئے تے اوہناں دی حالت وِگڑ سکدی اے، میڈیکل رپورٹ

لہور( پنجابی میڈیا گروپ)سابق وزیراعظم نواز شریف دی میڈیکل رپورٹ لہور ہائی کورٹ وچ جمع کروادتی گئی اے جس دے مطابق نواز شریف علاج توں بغیر پاکستان گئے تے اوہناں دی حالت وِگڑ سکدی اے۔نواز شریف دی3 صفحیاںاُتے طبی رپورٹ لہور ہائیکورٹ وچ جمع کروادتی گئی ، امجد پرویز ایڈووکیٹ دی وساطت نال نواز شریف دی 3 صفحیاں دی رپورٹ جمع کروائی گئی اے۔رپورٹ دے مطابق ڈاکٹراں نے نواز شریف نوں سفر کرن توں روک دتا، کلثوم نواز دی وفات توں بعد نواز شریف زیادہ دبا وچ نیں، نواز شریف علاج توں بغیر پاکستان گئے تے اوہناں دی حالت وِگڑ سکدی اے، ذہنی دبا دے محول وچ نواز شریف دی بیماری ہور وِگڑ سکدی اے۔رپورٹ وچ دسیا گیا اے کہ نواز شریف اینجیو گرافی کروائے بغیر لندن توں نہ جاون، نواز شریف ذہنی دبا دے بغیر اپنی سرگرمیاں جاری رکھن، اپنیاں دوایاں لین، کھلی فضا وچ چہل قدمی کرن تے چہل قدمی دے دوران کورونا توں بچن دے اقدامات وی کرن۔رپورٹ وچ ہور دسیا گیا کہ نواز شریف دل دے مریض تے کورونا پاروں اوہناں دی جان وی جا سکدی اے، کورونا پاروں نواز شریف نوں ساہ دا مسئلہ وی ہو سکدا اے