ملک نوں غلامی ول لے جایا جا رہا اے : مولانا فضل الرحمان

چمن( پنجابی میڈیا گروپ)حکومت مخالف اتحاد پاکستان ڈیمو کریٹک موومنٹ (پی ڈی ایم) دے سربراہ تے امیر جمعیت علمائے اسلام (ف) دے سربراہ مولانا فضل الرحمن ہوراں آکھیا کہ حکمراناں نے ملک نوں معاشی طور اُتے کنگال کردتا، آئی ایم ایف دے دبا اُتے پارلیمنٹ توں بل پاس کرایا گیا، ملک نوں غلامی ول لے جایا جا رہیا اے، سٹیٹ بینک براہ راست آئی ایم ایف دے کنٹرول وچ چلا گیا۔چمن وچ جلسے نال خطاب کردیاں ہویاں امیر جمعیت علمائے اسلام دا کہنا سی کہ امریکا چاہے گا پاکستان تے افغانستان دے درمیان تعلقات خراب ہون ، برطانیہ ہندوستان توں گیاتے کشمیر دا جھگڑا چھڈ کے گیا تاکہ لڑائیاں ہندیاں رہن ، برطانیہ عرب دنیا توں نکلیا تے جاندیاں جاندیاں اسرائیل دا ناسور چھڈ دتا۔ ایسی طرح امریکا افغانستان توں نکلیا تے ڈیورنڈ لائن دی لڑائی چھڈ گیا تاکہ کسی طریقے نال ایہ2 دوست، دوست نہ رہن، سرحداں اُتے ہر ملک دا اپنا موقف ہوسکدا اے لیکن سرحداں دے تنازع اُتے جنگاں نہیں لڑیاں جاندیاں تے ایہ دور جنگاں دا اے وی نہیں، اگر اسیں ایہ جنگ لڑاں گے تے امریکا دی سازش کامیاب ہوئے گی، میں پاکستان تے افغانستان دوناں نوں مشورہ دیندا واں کہ ساہنوں اپنے قدم اوس پاسے جان توں روکنے ہون گے۔اوہناں دا کہنا سی کہ ساڈھی خارجہ پالیسی نہیں اے، خارجہ پالیسی اوس ویلے بن دی اے جدوں تہاڈی معیشت مضبوط ہوئے، لوگ تہاڈے نال کاروبار کرنا چاہون، دنیا دے مفاد تہاڈے نال وابستہ ہون، اک کنگال ملک نال کیہڑا بے وقوف ہوئے گا جیہڑا تجارت تے کاروبار کرے گا۔ کون بے وقوف ہوئے گا جیہڑا ایس نالائق حکومت دی نکام معاشی پالیسیاں دے ہندیاں ہویاں پاکستان وچ سرمایہ کاری کرے گا تے جدوں چین نے سرمایہ کاری کیتی تے اوہناں دے حکمراناں نوں ملک دے حوالے کردتا گیا۔