جہانگیر ترین تے شہباز شریف دے کیساں دی تفتیش کرن والے ایف آئی اے افسر تبدیل

اسلام آباد( پنجابی میڈیا گروپ)شوگر سکینڈل تے مبینہ منی لانڈرنگ وچ پاکستان تحریک انصاف دے رہنما تے پاکستان مسلم لیگ(ن) دے صدر شہباز شریف دے کیساںدی تفتیش کرن والے ایف آئی اے دے افسراں نوں بدل دتا گیا اے۔وفاقی تحقیقاتی ادارے (ایف آئی اے) وچ9 اسسٹنٹ ڈائریکٹراں دے تبادلے کیتے گئے جناں دیاں خدمتاں ایڈیشنل ڈائریکٹر جنرل نال کراچی دے سپرد کردتیاں گئیاں نیں جدکہ ایف آئی اے لہور وچ جاری اہم کیساں دی تحقیقات اُتے مامور تین اسسٹنٹ ڈائریکٹر وی تبدیل ہون والیاں وچ شامل نیں۔اسسٹنٹ ڈائریکٹر سید علی مردان شہباز شریف کیس دے تفتیشی افسر نیں، اسسٹنٹ ڈائریکٹر سید علی مردان سابق ڈی جی بشیر میمن دے خلاف تحقیقات کرن والی جی آئی ٹی دا وی حصہ اے ، اسسٹنٹ ڈائریکٹر عمید ارشد تے رانا فیصل وی اہم کیساں دی تحقیقات وچ شامل نیں۔ تبدیل ہون والے اسسٹنٹ ڈائریکٹراں وچ عبدالقیوم ، زوار احمد، شیراز عمر ، ندیم احمد ، صبغت اللہ خان دے ناں وی نیں۔