حکومت دا گھر گھر جا کے کورونا ویکسین لان دااعلان

اسلام آباد( پنجابی میڈیا گروپ) پورے ملک وچ کورونا کیس ودھن اُتے حکومت نے گھر گھر جا کے ویکسین لان دااعلان کردتا اے ۔ وفاقی وزیر منصوبہ بندی تے نیشنل کمانڈ اینڈ آپریشن سنٹر(این سی او سی) دے سربراہ نے آکھیا کہ کورونا توں بچن لئی ویکسی نیشن ضروری اے،55 ہزارٹیماں گھر گھر جاکر ویکسی نیشن کرن گیاں، کورونا ویکسی نیشن دی خصوصی مہم شروع کردتی گئی اے ، عوام دی وڈھی تعداد بوسٹر ڈوز لوا چکی، بوسٹر ڈوز لوان والیاں نوں کورونا ہون دے باوجود گھٹ مسائل دا ساہمنا کرنا پیا۔سربراہ این سی او سی نے ہور آکھیا کہ18کروڑ بندیاں نوں ویکسین لائی جاچکی اے ، ویکسی نیشن کرانے والے علاقیاں وچ کورونا ہون والے بندیاں نوںگھٹ مسائل دا ساہمنا کرنا پیا، اوہ علاقے جیتھے ویکسی نیشن ودھ ہوئی سی اوتھے کورونا دے کیس گھٹ ہوئے، اجے وی سارے پاکستانیاں نے کورونا ویکسی نیشن نہیں کرائی،ویکسین مفت لائی جارہی اے تے عوام ہرصورت ویکسی نیشن کروان۔وزیراعظم دے معاون خصوصی ڈاکٹر فیصل سلطان ہوراں آکھیا کہ بوسٹر ڈوز نال قوت مدافعت ودھے گی،25لکھ بندے بوسٹر ڈوز لوا چکے، کورونا ویکسین دی بوسٹر ڈوز وی مفت لائی جارہی اے، عوام کورونا ویکسین دی بوسٹر ڈوزلازمی لوان، 55ہزارٹیماں ویکسین دی خصوصی مہم وچ حصہ لے رہی اے تے کورونا توں جان چھڈوان دا واحد حل ویکسی نیشن اے۔