پنجاب وچ بلدیاتی الیکشن مئی وچ شروع ہون گے

اسلام آباد( پنجابی میڈیا گروپ)پنجاب وچ بلدیاتی الیکشن دا پہلا مرحلہ مئی وچ ہوئے گا جدکہ الیکشن کمیشن نے صوبائی حکومت نال چھیتی توں چھیتی سارے اقدام چُکن دی ہدایت کردتی ۔ پنجاب وچ بلدیاتی الیکشن دے معاملے اُتے چیف الیکشن کمشنر سکندر سلطان راجہ دی زیر صدارت اہم اجلاس ہویا ، اجلاس وچ سیکرٹری لوکل گورنمنٹ پنجاب، ممبران تے سیکرٹری الیکشن کمیشن نے رلت کیتی ۔چیف سیکرٹری پنجاب مصروف ہون پاروں اجلاس وچ رلت نہ کر سکے، اجلاس وچ بلدیاتی آرڈیننس نوں بلدیاتی ایکٹ وچ تبدیل کرن دا معاملہ زیر غور آیا۔ پنجاب دے بلدیاتی الیکشن مرحلہ وار کران اُتے وی مشاورت کیتی گئی۔ذرائع دے مطابق صوبے وچ بلدیاتی الیکشن دا پہلا مرحلہ مئی وچ ہوئے گا۔ الیکشن کمیشن نے پچھیا کہ پنجاب حکومت دسے کہ بلدیاتی الیکشن کِنے مرحلیاں تے کنیاں ضلعیاں وچ پہلے بلدیاتی الیکشن کروائے جان گے، جس اُتے پنجاب حکومت نے چھیتی تفصیل فراہم کرن دی یقین دہانی کروا دتی ۔ الیکشن کمیشن نے پنجاب حکومت توں چھیتی توں چھیتی سارے اقدام چُکن دی ہدایت کردتی،22 مارچ نوں حلقہ بندیاں دی اشاعت دے فوری بعد شیڈول دا اعلان کردیواںگے۔