سینئر رہنما سابق وزیر داخلہ رحمن ملک دُنیا نوں چلانا کر گئے

اسلام آباد (پنجابی میڈیا گروپ) پاکستان پیپلزپارٹی دے سینئر رہنما تے سابق وزیر داخلہ سینیٹر رحمن ملک علالت پاروں اسلام آباد دے اک نجی ہسپتال وچ انتقال کر گئے۔ اوہناں دی عمر70 ورھے سی تے اوہ پچھلے مہینے توں ہسپتال وچ زیر علاج سن۔ رحمن ملک دے انتقال دی تصدیق کردیاں ہویان اوہناں دے ترجمان ریاض علی طوری نے آکھیا کہ دکھ، درد تے غم ناقابل بیان نیں، اج میں ہمیشہ لئی اک عظیم دوست تے مہربان سرپرست توں ہمیشہ لئی محروم ہو گیا ہاں ۔ رحمن ملک نوں پچھلے مہینے جنوری وچ کورونا وائرس دی تشخیص ہوئی سی جس پاروں اوہناں دے پھیپھڑے شدید متاثر ہوگئے سن جس نال اوہناں نوں ساہ لین وچ دشواری دا ساہمنا سی ۔ فروری دے اوائل وچ اوہناں طبیعت وگڑن اُتے اوہناں اسلام آباد دے شفا انٹرنیشنل ہسپتال وچ وینٹیلیٹر اُتے منتقل کیتا گیا سی ، رحمٰن ملک نے سوگواراں وچ بیوہ تے2 پُتر چھڈے نیں۔ سینیٹر رحمن ملک12دسمبر 1951 نوں سیالکوٹ وچ پیدا ہوئے، اوہناں نوں کراچی یونیورسٹی توں ایم ایس سی شماریات دی ڈگری حاصل کیتی ، سیاست توں پہلاں اوہ ایف آئی اے دے سربراہ سن۔ رحمن ملک بینظیر بھٹو شہید دے با اعتماد تے وفادار ساتھیاں وچوں سن اوہناں نے اَت گردی دے خلاف جنگ وچ بوہت اہم تے بہادرانہ کردار ادا کیتا سی۔