حکومت نے اک وار فیر پٹرول دی قیمت ودھا دِتی

اسلام آباد(پنجابی میڈیاگروپ)پاکستان مسلم لیگ ن دی حکومت ولوں مسلسل چوتھی وار پٹرول دی قیمت ودھائی گئی۔حکومت نے اک وار فیر پٹرول دی قیمت 14روپے85پیسے ودھا دِتی جس توں بعد اوس دی نویں قیمت248روپے74پیسے لیٹر ہوگئی اے۔ہائی سپیڈ ڈیزل دی قیمت13روپے23پیسے ودھائی گئی اے جس توں بعد اوس دی نویں قیمت276روپے 54پیسے ہو گئی اے۔یادرہے کہ عالمی مالیاتی ادارے(آئی ایم ایف)دے دبا اُتے آکے وفاقی حکومت نے پچھلے دناں قومی اسمبلی توں وزیر مملکت برائے خزانہ عائشہ غوث پاشا نے آئندہ مالی سال وچ مرحلہ وار بنیاداں اُتے پٹرولیم لیوی ٹیکس وچ50روپے ودھان دی ایوان توں منظوری منگی،ایوان نے پٹرول اُتے50روپے فی لیٹر لیوی عائد کرن دی ترمیم منظورکرلئی سی۔پچھلے دِناں فنانس بل وچ پٹرولیم لیوی دی منظوری لئی سی،یکم جولائی2021توں30جون2022 دے دوران پٹرول لیوی750دی بجائے855ارب روپے جمع کرن دا تخمینہ لایا گیا اے۔خیال رہے کہ پاکستان مسلم لیگ ن دی مخلوط حکومت نے اپریل وچ اقتدار سنھبالیا تے پہلے عالمی مالیاتی ادارے(آئی ایم ایف)ولوں دبا دے باوجود پٹرول دی قیمت نہیں ودھائی گئی سی،لیکن عالمی ادارے ولوں قرض پروگرام بحال نہ کرن دی دھمکی دے بعد وفاقی حکومت نے26مئی نوں پٹرول دی قیمت 30روپے فی لٹر ودھ کیتی سی،جس توں بعد پٹرول179روپے86پیسے،ڈیزل174روپے15پیسے،مٹی داتیل155روپے56روپے تے لائٹ ڈیزل148روپے31پیسے دا ہو گیا سی ۔ واضح رہے کہ2جون نوںحکومت نے پٹرول دی قیمت اک وار فیر30روپے وَدھ کرن دا اعلان کیتاسی۔پٹرول دی قیمت209روپے86پیسے ہو گئی سی،ڈیزل دی قیمت204روپے15پیسے ہوگئی سی،لائٹ ڈیزل آئل دی قیمت ودھا کے178روپے31 پیسے فی لٹر،مٹی دا تیل181روپے94پیسے ہو گئی سی ۔ ایسی طرح15جون نوں مسلسل تیجی وار حکومت نے پٹرول دی قیمت ودھائی سی ۔ پٹرول دی فی لٹر قیمت وچ24روپے3پیسے،ڈیزل دی قیمت وچ59روپے،مٹی دے تیل دی قیمت29.49 پیسے دا ودھا کیتا گیا جس توں بعد پٹرول دی قیمت233روپے89پیسے،ڈیزل دی قیمت263روپے 31پیسے روپے ہو گئی سی۔مٹی دے تیل دی قیمت211.43روپے ہو گئی سی۔