کرونا وائرس، راولپنڈی وچ 100بستریاں تے مشتمل ہسپتال بنان دا فیصلہ

کرونا وائرس دے مریضاں دے علاج لئی راولپنڈی دی ضلعی انتظامیہ نے اہم قدم چکدیاں 100بیڈز تے مشتمل ہسپتال قائم کرن دا فیصلہ کیتا اے۔ راولپنڈی انسٹیٹیوٹ آف یورولوجی (آر آئی یو) دے اک حصے وچ کرونا سپیشل یونٹ بنایا جاوے گا۔ ضلعی انتظامیہ نے 50بستر آر آئی یو منتقل کر دتے نیں تے ہور 50بستر کل اپڑا دتے جان گے جد کہ ہسپتال نوں اج ای بڑی حد تک فعال کر دتا جاوے گا۔

ایس توں علاوہ وفاقی حکومت نے کرونا وائرس نال نبڑن لئی اہم قدم چکدیاں سارے سرکاری ہسپتالاں توں افرادی قوت دی تفصیلات طلب کر لئیاں نیں تاں جے عملے دی دستیابی دا جائزہ لیا جا سکے۔ وائرس دے پھیلاؤ نال نبڑن لئی ہسپتالاں وچ عملہ دی تعیناتی سنے نویں بھرتیاں وی کیتی جا سکدی اے۔ وزارت صحت نے ماسک دی کمی نوں پورا کرن لئی ہنگامی بنیاداں تے خواہشمند کمپنیاں نوں ماسک دی تیاری دا لائسنس جاری کرن دا وی فیصلہ کیتا اے۔