پرویز مشرف دی روایتاں نوں موجودہ حکومت نے اگے ودھایا: سینیٹر پرویز رشید

اسلام آباد: مسلم لیگ (ن) دے رہنما سینیٹر پرویز رشید آکھیا اے مشرف کہندے سن نوازشریف نوں پاکستان آن نہیں دیواں گا، ایہ کہندے نیں جان نہیں دیواں گا۔ سیاست وچ نوازشریف نوں آن تے جان نہ دینا، ایہدے علاوہ حکومت دے کول کوئی کم نہیں اے۔

سینیٹ وچ اظہار خیال کردیاں اوہناں دا کہنا سی حکومت دباء دے سارے حربے استعمال کر رہی اے۔ ہر الزام پچھلی حکومت تے لا دتا جاندا اے۔ اختلاف رائے نوں برداشت کرو، تنقید نوں سنن دا حوصلہ وی ہونا چاہیدا اے۔ سینیٹر پرویز رشید دا کہنا سی ایناں لوکاں نوں عوامی مسئلیاں نال کوئی غرض نہیں، موجودہ دور وچ لوکاں دا معاشی قتل ہویا۔ ایہناں دی ساری سیاست ایہ اے کہ نوازشریف نوں جیل وچ کیویں رکھنا اے۔

لیگی رہنما نے آکھیا فخر کیتا جا رہیا اے ٹرمپ ثالثی دا رول ادا کرے گا۔ خدا دا خوف کرو کسے نوں ثالثی دا کہہ رہے آں، اوہ تہاڈا تیتر لے جاوے گا تے تہاڈے ہتھ کوا پھڑا کے چلا جاوے گا۔ اوہناں دا کہنا سی دنیا بھر وچ پٹرولیم مصنوعات دی قیمتاں وچ کمی ہوئی پر حکومت نے پنج روپے گھٹ کرکے حاتم طائی دی قبر تے لت ماری۔

لیوی سیلز ٹیکس دی مد وچ ہر مہینے دس ارب روپیہ غریباں دی جیباں توں کڈھیا جاوے گا۔ اوہناں نے خدشہ ظاہر کیتا آن والے دناں وچ توانائی بحران ودھے گا۔