پاک افغان معاملات دے حل لئی امریکا دی لوڑ نہیں: شاہ محمود قریشی

اسلام آباد: وزیر خارجہ شاہ محمود قریشی نے اپنے اک اہم بیان وچ آکھیا اے پاک افغان معاملات دے حل لئی امریکا دی لوڑ نہیں اے۔ وزیر خارجہ شاہ محمود دا غیر ملکی خبر ایجنسی رائٹرز نوں انٹرویو دیندیاں کہنا سی پاکستان تے افغانستان نوں دوطرفہ معاملات دے حل لئی امریکا دی لوڑ نہیں اے۔ مینوں افغانستان دے نال کوئی مسئلہ ہویا تے میں امریکا توں کردار ادا کرن دا نہیں کہواں گا سگوں میں آپ رابطہ کراں گا۔

اک سوال دا جواب دیندیاں اوہناں دا کہنا سی افغاناں نوں سمجھنا چاہیدا اے امریکا ایتھوں نکل رہیا اے جد کہ اسیں ہمیشہ گوانڈھی رہواں گے۔ اوہناں نے تسلیم کیتا کابل تے اسلام آباد وچکار اعتماد دا بحران رہیا پر پاکستان نے اعتماد دی بحالی لئی ہر ممکن اقدام کیتا۔ اوہناں نے دسیا میں بطور وزیر خارجہ پہلا دورہ ای کابل دا کیتا۔ ایہدے توں ثابت ہوندا اے ساڈے لئی افغانستان کناں اہم اے۔

اوہناں دا کہنا سی افغانستان وچ جلدی قیدیاں دے تبادلے نال معاملات اگے ودھن گے۔ قیدیاں دے تبادلے نال دوواں فریقاں وچکار اعتماد سازی ہووے گی۔ شاہ محمود قریشی د اکہنا سی قیدیاں دے تبادلے نال ایہ پیغام جاوے گا کہ سب اپنے ماضی توں نکل چکے نیں تے مستقبل تے نظر اے۔