ٹک ٹاک تے پابندی، پی ٹی اے نوں جواب داخل کران دی ہور مہلت مل گئی

لہور: ہائی کورٹ نے ٹک ٹاک تے پابندی دی درخواست تے پاکستان ٹیلی کمیونی کیشن اتھارٹی نوں جواب داخل کران لئی 2ہفتے دی مہلت دے دتی۔ لہور ہائی کورٹ دے جسٹس شاہد وحید نے ویڈیو شیئرنگ سوشل میڈیا ایپ ٹک ٹاک دی بندش لئی متفرق درخواست تے سماعت کیتی۔

درخواست گزار دا موقف سی ٹک ٹاک ایپ دے راہیں نوجوان نسل نوں تباہ کیتا جا رہیا اے، ایہدے نال ویلا تے پیسے دے ضیاع دے نال فحاشی وی عام ہو رہی اے۔ نوجوان نسل نوں سوشل میڈیا دے منفی اثرات توں بچان دے اقدامات نہیں کیتے گئے، عدالت درخواست دے حتمی فیصلے تک ٹک ٹاک ویڈیوز نشر کرن توں روکن دا حکم دیوے۔

عدالت دے ساہمنے پیمرا دے وکیل نے تحریری جواب داخل کر دتا، جہدے وچ آکھیا گیا پیمرا سوشل میڈیا نوں ریگولیٹ نہیں کردا، الیکٹرانک میڈیا تے قابل اعتراض مواد چلیا ہووے تے درخواست گزار کونسل آف کمپلینٹ نال رجوع کرے، ایس لئی درخواست قابل سماعت نہیں اے، ایہنوں رد کیتا جاوے۔

عدالت دے ساہمنے پاکستان ٹیلی کمیونی کیشن اتھارٹی نے جواب داخل نہیں کروایا تے ادارے دے وکیل ولوں جواب داخل کرن لئی مہلت طلب کیتی گئی، جہدے تے عدالت نے سماعت دو ہفتیاں لئی ملتوی کر دتی۔