نوازشریف نوں واپس لیان دی کوششاں حکومت دی منافقت اے: بلاول بھٹو

لہور: پیپلزپارٹی دے چیئرمین بلاول بھٹو زرداری دا کہنا اے نوازشریف نوں واپس لیان دی کوششاں حکومت دی منافقت اے۔ لہور وچ میڈیا نال گل کردیاں بلاول آکھیا اسیں سب محب وطن پاکستانی آں، مثبت تنقید بغاوت یاں غداری نہیں ہوندی سگوں حکومت نوں صحیح راہ وکھان وچ مددگار ثابت ہوندی اے، پیپلزپارٹی نے ہمیشہ مثبت تنقید دا خیر مقدم کیتا اے، ریاست نوں وکھو وکھ آوازاں برداشت کرنی چاہیدیاں نیں، ایہناں آوازاں نوں دبان دی کوشش نہیں کرنی چاہیدی۔

چیئرمین پیپلزپارٹی دا کہنا سی حکومت نے تے آکھیا سی آئی ایم ایف دے کول نہیں جانواں گے، وزیراعظم نے آکھیا سی آئی ایم ایف دے کول گیا تے خودکشی کر لواں گا، آئی ایم ایف پیکیج عوام دے مفاد وچ ہونا چاہیدا اے پر پی ٹی آئی ایم ایف بجٹ دی وجہ توں عوام نوں مشکلات نیں، ہر پاکستانی دا مسئلہ مہنگائی اے، پیپلزپارٹی عوام دی جنگ لڑ رہی اے، اسیں نوازشریف دے دور وچ وی غلط پالیسی تے آواز چکی، جدوں نوازشریف پارلیمان نوں اہمیت نہیں دیندے سن تے اسیں آواز چکدیاں سن۔ اسیں حکومت نوں عوام دی مرضی نال ریاست چلان تے مجبور کراں گے۔