مستقبل وچ مہنگائی گھٹ ہون نال شرح سود وچ کمی واقع ہووے گی: گورنر سٹیٹ بینک

اسلام آباد: گورنر سٹیٹ بینک رضا باقر دا کہنا اے جدوں وی شرح سود دا ذکر ہوندا اے اسیں ایہنوں بزنس مین دے نکتہ نظر نال ویکھنے آں۔ آن والے ویلے وچ مہنگائی جیویں جیویں گھٹ ہووے گی اُنج اُنج شرح سود گھٹ ہووے گی۔ ایم این اے رانا تنویر حسین دی زیر صدارت پبلک اکاؤنٹس کمیٹی دا اجلاس ہویا، اجلاس دے دوران بریفنگ دیندیاں گورنر سٹیٹ بینک دا کہنا سی شرح سود دا ودھنا کوئی بری گل نہیں اے۔

اک طبقہ اوہ وی اے جہڑا اپنی جمع پونجی لا کے ایہدے منافع تے گزارا کردا اے۔ ڈاکٹر رضا باقر دا ہور کہنا سی جدوں شرح سود گھٹ ہوندی اے تے اوہ سفید پوش بندہ متاثر ہوندا اے، اک مہینے پہلاں ساڈھے 14فیصد تک مہنگائی سی، ہن ساڈھے 12فیصد تک مہنگائی تھلے آئی اے۔

بریفنگ دے دوران اوہناں نے ہور آکھیا ساڈی سیونگز بھارت توں کافی گھٹ اے، قومی بچت ودھان لئی سانوں اقدامات کرنے ہون گے، بھارت تے بنگلہ دیش دے مقابلے وچ ساڈی سیونگ گھٹ اے۔ گورنر سٹیٹ بینک دا کہنا سی ساڈے ملک وچ سیونگ ریٹ گھٹ اے، نیشنل سیونگ گھٹ ہوئیاں تے کرنٹ اکاؤنٹ خسارہ ودھے گا۔