منافع خور ساڈادشمن

روہیل اکبر

ساڈے ایتھے چور بازاری تے عام جئی گل اے۔ اسیں گاہکاں دے کپڑے وی اتارن دی کوشش کرنے آں۔ خوش قسمتی نال جے کوئی بچ جاوے تے ایہ اوہدا نصیب ۔ تسیں کسے ریہڑی یا ٹھیلے والے کولوں کوئی شے پھل وغیرہ خریددے او تے ایس گل دا بخوبی اندازہ وی ہووے گا کہ گھر جا کے جدوں تھیلا کھولدے او تے اوہدے وچوں گلیاسڑیا پھل وی نکل آندا اے۔ ایس توں تھوڑا جیا اتے چلو تے پٹرول پمپ والے اپنا میٹر اپنی مرضی نال چلاندے نیں۔ تسیں رکشے وچ بیٹھو تے کرایہ تہاڈی سوچ توںاتے چھالاں مارے گا۔ بس وچ سوار ہون لگو گے تے بس کنڈیکٹر تے ہیلپر تہاڈے کپڑے وی پھاڑ دیوے گا۔ جے تسیں اوہدی بس وچ نہ بیٹھو گے ‘کھان والے ہوٹل تے چلے جائو اوتھے تہانوں چربی والے گھیونال تیار کیتا ہویا سالن ملے گا تے کیمیکل والی پتی نال تیار ہون والی مزیدار چاہ پیش کیتی جاوے گی۔ جے کوئی تہوار آ گیا تے فیر شیواں دی قیمتاں اسمان نال گلاں کرنا شروع کر دین گئیاں۔
دوکانداراں نوں جے علم ہو جاوے کہ فلاں شے دی قلت پیدا ہو گئی اے تے اوہ اوہنوں لکان دا کم شروع کر دین گے تے فیر اپنی مرضی دی قیمت وصول کرن گے۔ تسیں موٹر وے تے سفر کر رہے او تے اوتھے وی قیمتاں اوہ اپنی مرضی نال وصول کردے نیں۔ اجے کجھ دن پہلے سانحہ مری وی لنگھیا اے اوتھے دے ہوٹلاں دی لٹ مار دے قصے وی سنے ہون گے۔ بہت سارے دوست خود ایہہ سارے حالات بھگت کے آئے نیں تے الزام حکومت اتے آندا اے ۔اسیںتے اوہ لوک آں جہڑے مرن والیاں دے ہتھ تے کن وڈ کے اوہناں دے زیور چوری کر لینے آں۔ ساہیوال دے کول تے سندھ وچ ہون والا ٹرین حادثہ وی یاد ہووے گا جتھے لٹیریاں نے ہلاک ہون والی زنانیاں دے کنگن تے والیاں اتارن لئی اوہناں دے جسم کٹ دتے سن۔ حکومت کجھ بندیاں نوں تے سدھا کر سکدی اے جتھے آوے دا آوا ای وگڑیا ہووے اوتھے گرفتاریاں تے پکڑ دھکڑ وی کوئی معنی نہیں رکھدی کیوں جے اوہناں چوراں نوں بچان والے وڈے ڈاکو میدان وچ نکل آندے نیں۔ ناجائز منافع خور تے ذخیرہ اندوز ہر ویلے موقع دی تلاش وچ رہندے نیں جتھے اوہناں نوں موقع ملدا اے۔ واردات کرن وچ وقت نہیں لاندے۔ تسیں رمضان المبارک دے دناں وچ اشیائے خوردونوش دی قیمتاں چیک کرو تے ہن نارمل حالات وچ ویکھ لو‘ ہر مسلمان کھجوور نال روزہ کھولنا سنت تے ثواب سمجھدا اے مگر منافع خور ایہناں مبارک دناں وچ کھجور دی قیمتاں وی کئی گنا ودھا دیندے نیں۔
ایہناں منافع خوراں نوں قابو کرن لئی پنجاب حکومت نے اک آرڈیننس پاس کیتا اے۔ امید اے کہ ایس نال پنجاب وچ اشیاء خوردونوش اتے ناجائز منافع خوری کرن والیاںدے خلاف شکنجہ ہور سخت ہووے گا تے ایس سلسلہ وچ گورنر چودھری سرور نے منافع خوراں دے خلاف ایکشن لئی ترمیمی آرڈیننس اتے دستخط کر دتے جہدے مطابق وزیراعلیٰ پنجاب سردار عثمان بزدار دی زیر نگرانی 12رکنی پرائس کنٹرول کونسل تشکیل دتی جاوے گی۔ پرائس کنٹرول کونسل وچ 4صوبائی وزیر‘ چیف سیکرٹری تے دُجے افسر وی شامل ہون گے۔ وزیر برائے انڈسٹری‘ وزیر برائے لائیوسٹاک‘ وزیر خوراک تے ایگری کلچر کونسل دے رکن ہون گے۔ پرائس کنٹرول کونسل سپیشل مجسٹریٹ اور دوجے حکومتی افسران دی کارکردگی وی مانیٹر کرے گی۔ پاس ہون والے ایس نویں ایکٹ دے تحت ذخیرہ اندوزاں نوں اک مہینے توں اک سال تک سزا‘ اک ہزار توں 1لکھ روپے تک جرمانہ ہووے گا۔ دوبارہ منافع خوری دے جرم اتے گھٹ توں گھٹ اک سال سزا تے گھٹ توں گھٹ اک لکھ روپے جرمانہ کیتا جاوے گا۔ ناجائز منافع خوری تے ذخیرہ اندوزی کرن والے عناصر کسی رعایت دے مستحق نہیں کیوں جے ایہ افراد نہ صرف معصوم بالاں دے دُدھ وچ ملاوٹ کردے نیں بلکہ کیمیکل نال تیار کیتا ہویا ددھ دھڑلے نال فروخت کردے نیں۔ ایس ویلے لہور وچ ددھ فروخت کرن والی سینکڑاں دکاناں نیں جنہاں وچوں اکثریت دے کول کوئی فارم ہائوس اے تے نہ ای کوئی مجھ اوہدے باوجود 24گھنٹے ددھ دستیاب ہوندا اے۔
مینوں یاد اے شروع شروع وچ جدوں فوڈ اتھارٹی بہت ای فعال سی عائشہ ممتاز نے ایہناں نوسربازاں نوں پھڑنا شروع کیتا تے انج محسوس ہوندا سی کہ اسیں ہر شے ای دو نمبر نہیں بلکہ ایس توں اگلے نمبراں والی استعمال کردے رہے۔ ایتھوں تک کہ بکرے دے گوشت دے بجائے کتے تے کھوتے وی کھوائے جاندے رہے تے ہر دن مناں دے حساب نال ددھ ضائع کیتا جاندا سی جہڑا کھاد‘ صرف تے آئل نال تیار کیتا جاندا سی۔ چھوٹے چھوٹے ہوٹلاں والے تے سانوں نہ جانے کیہ کیہ کھواندے رہے۔
وڈے ہوٹل وی عائشہ ممتاز دی نظراں توں نہ بچ سکے۔
گندگی تے صفائی نہ ہون پاروں مال روڈ اتے واقع ہوٹلاں دے کچن وی سیل ہوئے بلکہ جنہاں بیکریاںتوں اسیں صبح ناشتے دا سامان لے کے جانے آں جدوں اوہناں دا کچہ چٹھا کھلیا تے پتہ چلیا سارے گندے انڈے ایتھوں تک کہ انڈیاں وچ پیدا ہون والے بچے وی اینہاں بیکری دی شیواں وچ استعمال ہوندے رہے بلکہ تہانوں یاد ہووے گا پی آئی سی لہور وچ جعلی دوائیاں نال کئی بندے موت دے منہ وچ چلے گئے سن۔ اسیں انسانی زندگیاں دے نال کھیڈن توں وی باز نہیں آندے۔ میں سمجھنا واں کہ ناجائز منافع خوراں تے ذخیرہ اندوزاں دے خلاف جنھا وی گھیرا تنگ کیتا جاوے گھٹ اے۔
ایہ نہ صرف ساڈی نوجوان نسل تے معصوم بالاں دی زندگیاں نال کھیڈدے نیں بلکہ بزرگاں دے بڑھاپے دے نال وی کھیڈدے نیں۔ پیسے کمان دی ہوس وچ اسیں ہر اوہ شے ویچ رہے آں جہڑی مضر صحت ہون دے نال نال انسانی زندگی نوں وی مفلوج تے اپاہج بنا سکدی اے۔
وزیراعلیٰ پنجاب سردار عثمان بزدار دی نگرانی وچ قائم ہون والی ایس کمیٹی وچ ہور بندیاں نوں وی شامل ہونا چاہیدا اے تاں جے ایس کارخیر وچ سارے اپنا اپنا حصہ ضرور پائیے۔ ایہ ساڈے مستقبل دا سوال اے جہڑا اوہدوں ای بچ پاوے گا جے اسیں اپنا اج درست کر لیا۔ ایس لئی اج نوں محفوظ بنان لئی کجھ تلخ فیصلے کرنا بہت ضروری نیں کیوں جے منافع خور ساڈا دشمن اے۔