مشکلاں دے باوجود پاکستان دا مستقبل روشن اے،وزیرخزانہ

ا سلام آباد(پنجابی میڈیاگروپ) وفاقی وزیر خزانہ سینیٹر اسحاق ڈارنے آکھیا اے کہ ساریاں مشکلاں دے باوجود پاکستان دا مستقبل روشن اے جس طرح سینیٹ دی گولڈن جوبلی دی تقریب دے 3دن ایتھے امن ، نظم و ضبط تے اک دُوجے دا احترام تے برداشت دا کلچر ویکھیا اللہ کرے ایہ سلسلہ ہمیشہ برقرار رہے ۔ جمعہ نوں سینیٹ آف پاکستان دی گولڈن جوبلی تقریب دے انعقاد اُتے چیئرمین سینیٹ نوں مبارکباد دیندیاں ہویاں اوہناں نے آکھیا کہ ساہنوں اپنے اجدادولوں وِکھ مملکت دے قیام دے مقاصد نوں مد نظر رکھنا ہوئے گا ، اینہاں 3 روزہ تقریباں دے دوران امن ، ڈسپلن تے برداشت دے علاوہ اک دُوجے دااحترام ویکھیا ، ایہ کسی وی مہذب پارلیمان تے جمہوری نظام دی بنیاد اے ، میری ایہ دعا اے کہ ایہ محول جیہڑا ایتھے نظر آیا اوہ ہمیشہ قائم و دائم رہے ۔