ملک نوں بحران توں کَڈن لئی قیادت نوں سرجوڑ دے بیٹھنا ہوئے گا،اعظم نذیرتارڑ

اسلام آباد (پنجابی میڈیاگروپ)وفاقی وزیر قنون و انصاف اعظم نذیر تارڑ نے اپوزیشن نوں ملک تے عوام دی بہتری لئی ایک نال مل بیٹھن دی دعوت دیندیاں ہویاں آکھیا اے کہ دلائل نال اک دوجے نوں قائل کرنا سیاست اکھواندا اے ،ملک نوں موجودہ معاشی بحران توں کَڈن لئی ساری قیادت نوں سرجوڑ کے بیٹھنا ہوئے گا،معاشی معاملات بہتری دی بجائے ابتری ول جانا لمحہ فکریہ اے۔جمعہ نوں سینٹ آف پاکستان دی گولڈن جوبلی تقریبات دے آخری دن اظہار خیال کردیاں ہویاں وفاقی وزیر قنون نے آکھیا کہ ایس ایوان وچ ہر شعبہ زندگی نال جُڑے افراد ولوں گولڈن جوبلی تقریبات دے دوران اظہار خیال نال آئندہ دیاں راہواں متعین کرن وچ آسانیاں پیدا ہون گیاں ۔اوہناں نے آکھیاکہ ایس شاندار تقریب دے انعقاد اُتے چیئرمین سینیٹ ، اوہناں دی ٹیم ، سیکرٹری سینیٹ ، پروٹوکول سیکشن ، میڈیاسیکشن سنے سارے مبارک باد دے حقدار نیں ، اوہناں نوں خراج تحسین پیش کردے ہاں۔