افسوس اے کہ ارشد شریف قتل کیس وچ کوئی پیشرفت نہیں ہوئی، چیف جسٹس

اسلام آباد (پنجابی میڈیاگروپ)سپریم کورٹ دے چیف جسٹس عمر عطا بندیال نے سینئر صحافی ارشد شریف دے قتل دے خلاف ازخود نوٹس دی سماعت دے دوران ریمارکس دتے نیں کہ بوہت دکھ اے ارشد شریف کیس وچ کوئی پیش رفت نہیں ہوئی، دفتر خارجہ2ملکاں توں کیس وچ مدد لین وچ نکام رہیا۔جمعہ نوں سینیئر صحافی ارشد شریف قتل اُتے ازخود نوٹس کیس دی سماعت چیف جسٹس عمر عطا بندیال دی سربراہی وچ پنج رکنی لارجر بنچ نے کیتی۔ارشد شریف دی والدہ نے سپریم کورٹ دے ازخود نوٹس اُتے اعتراض کردتا، ارشد شریف دی والدہ دے وکیل شوکت عزیز صدیقی نے آکھیا کہ سپریم کورٹ دی کارروائی اُتے تحفظات نیں ۔وکیل والدہ ارشد شریف نے عدالت نوں دسیا کہ ارشد شریف دی والدہ اپنے موقف دے مطابق فرسٹ انفارمیشن رپورٹ(ایف آئی آر)درج کرانا چاہندیاں نیں۔وکیل نے موقف اپنایا کہ قنون دے مطابق سپریم کورٹ ارشد شریف کیس دی تحقیقات دی نگرانی نہیں کرسکدی۔مرحوم ارشد شریف دی والدہ دے وکیل نے آکھیا کہ ساڈی استدعا اے ارشد شریف کیس وچ گناہ گاراں نوں سزا ملے تے بے گناہ لپیٹ وچ نہ آئے جس اُتے جسٹس اعجاز الاحسن نے آکھیاکہ اسیں ایتھے کسی سزا تے بری نہیں کررہے صرف تحقیقات وچ سہولتاں فراہم کررہے ہاں۔