وفاقی حکومت دا ملک وچ افراتفری پھیلان والیاں دے نال سختی نال نمٹن دا فیصلہ

اسلام آباد( پنجابی میڈیاگروپ)وفاقی حکومت نے ملک وچ افراتفری پھیلان والے عناصر دے نال سختی نال نمٹن دا فیصلہ کر لیا، اتحادی جماعتاں دے اجلاس دا اعلامیہ جاری کر دتا گیا ۔ اعلامیے دے مطابق وزیراعظم شہباز شریف دی زیر صدارت سیاسی تے قومی سلامتی دے امور اُتے6 گھنٹے تک طویل اجلاس ہویا جس وچ حکومت دیاں اتحادی جماعتاں تے حساس اداریاں دے سربراہواں نے رَلت کیتی،اجلاس وچ پنجاب تے خیبرپختونخوا وچ الیکشن دی صورتحال دا جائزہ لیا گیا ۔ اجلاس وچ موجود رَلتیاں نوں لہورتے اسلام آباد وچ تحریک انصاف دے کارکناںدی پرتشدد کارروائیاںاُتے بریفنگ وی دتی گئی، رَلتیاں نوں دسیا گیا کہ انتشار پھیلان والے کارکن دیہاڑی اُتے بلائے گئے سن، گرفتار افراد توں دوران تفتیش اہم انکشافات وی ہوئے نیں۔ اعلامیہ دے مطابق وفاقی حکومت نے 22 مارچ نوں پارلیمنٹ دا سانجھا اجلاس سَدھ لیا جس وچ ریاستی عملداری یقینی بنان لئی اہم فیصلے کیتے جان گے، اجلاس وچ عدالتی حکم اُتے عمل درآمد کرن والی پلس، رینجرز اُتے عمران خان دے حکم پر حملیاں تے تشدد دی شدید الفاظ وچ مذمت کیتی گئی۔سیاسی رہنماواں ولوں اجلاس وچ مختلف تجویزاں وی پیش کیتیاں گئیاں، ایس موقع اُتے رَلتیاں نے عمران خان بارے 2ٹوک پالیسی اپنان دی رائے دیندیاں ہویاں آکھیا کہ حکومتی رٹ دی عملداری لئی عمران خان نوں قنون دے کٹہرے وچ لیانا ہوئے گا ۔ اعلامیے وچ آکھیا گیا کہ کالعدم تنظیماں دے تشدد تربیت یافتہ جتھیاں ذریعے ریاستی اداریاں دے افسراں تے اہلکاراں اُتے لشکر کشی انتہائی تشویش ناک اے، ایہ ریاست دشمنی اے جس نوں برداشت نہیں کیتا جا سکدا ،شواہد تے ثبوت موجود نیں، اجلاس وچ جوڈیشل کمپلیکس اُتے حملے، پلس افسراں تے اہلکاراں نوں زخمی کرن، املاک دی توڑ پھوڑ تے جلائو گھیرا کرن اُتے سخت کارروائی کرن دا فیصلہ کیتا گیا۔اجلاس دے رَلتیاں نے سوشل میڈیا تے بیرون ملک اداریاں بالخصوص آرمی چیف دے خلاف مہم دی شدید مذمت کردیاں ہویاں پاکستانیاں توں اپیل کیتی کہ اوہ مذموم ایجنڈے دا حصہ نہ بنن، لسبیلہ دے شہیداں دے خلاف غلیظ مہم چلان والے عناصر دے خلاف کارروائی کرن دا وی فیصلہ کیتا ۔ اعلامیہ وچہور آکھیا گیا اے کہ کسی وی معاشرے وچ ایہ رویہ قابل قبول نہیں ہُندا ایہ آزادی اظہار نہیں، عمران خان تے اوہناں دے ساتھیاں دے نال سلوک نال ترازو دے پلڑے برابر نہ ہون دا تاثرہورگہرا ہو رہیا اے، اک ملک وچ انصاف دے 2معیار قبول نہیں۔