مفت آٹا فراہم کرن اُتے مکمل مطمعن ہاں،شہبازشریف

بہاولپور/اسلام آباد(پنجابی میڈیاگروپ)وزیراعظم محمدشہبازشریف نے شہریاں نوںمفت آٹا فراہم کرن دے عمل اُتے اطمینان دااظہار کردیاں ہویاں ہدایت کیتی اے کہ مفت آٹا تقسیم کرن والے مراکز وچ بزرگاں تے عورتاں لئی خصوصی انتظام یقینی بنائے جان، بزرگاں،عورتاں تے بیمارشہریاں نوں ترجیحی بنیاداں اُتے آٹا فراہم کیتا جائے۔وزیراعظم محمد شہباز شریف نے ایہ ہدایت اتوارنوں مفت آٹا تقسیم کرن دے عمل تے انتظاماںدا جائزہ لین لئی بہاولپوردے دورہ دے دوران جاری کیتی ۔ وزیراعظم نے ڈرنگ سٹیڈیم تے عباسیہ ہائی سکول وچ قائم مفت آٹا مراکز دا دورہ کیتا ، شہریاں دیاں شکایتاں تے مسائل سنے تے حکام نوںاوہناں دے حل دی ہدایت کیتی۔وزیراعظم نے ایس دوران شہریاں وچ مفت آٹا تقسیم کرن دے عمل دا خود جائزہ لئیا۔