ایمرجنسی لاکے ہی الیکشن ملتوی کیتے جاسکدے نیں،چیف جسٹس

اسلام آباد(پنجابی میڈیاگروپ)چیف جسٹس آف پاکستان عمر عطا بندیال نے ریمارکس دتے نیں کہ جمہوریت لئی الیکشن ضروری نیں، بحران توں نمٹن لئی قربانی دینا پیندی اے، الیکشن لئی پورے بجٹ دی لوڑ ہی نہیں اے ، 20 ارب لئی کٹ ساڈیاں تنخواہواں اُتے وی لایا جاسکدا اے۔پنجاب تے خیبرپختونخوا وچ الیکشن دی تریخ بارے تحریک انصاف دی درخواست اُتے سماعت چیف جسٹس عمر عطا بندیال دی سربراہی وچ سپریم کورٹ دے5رکنی لارجر بنچ نے کیتی، جس وچ نویں اٹارنی جنرل منصور عثمان اعوان تے سینیٹر فاروق ایچ نائیک عدالت وچ پیش ہوئے۔چیف جسٹس عمر عطا بندیال نے نویں اٹارنی جنرل منصور عثمان دا عدالت وچ خیر مقدم کیتا، اوہناں دا کہنا سی کہ توقع اے تہاڈے توں بہترین معاونت ملے گی۔چیف جسٹس نے ہور آکھیا کہ کارروائی نوں لمبا نہیں کرنا چاہیدا، سادہ جیہا سوال اے کہ الیکشن کمیشن تریخ اگے کر سکدا اے یا نہیں؟ اگر الیکشن کمیشن دا اختیار ہویا تے گل ختم ہوجائے گی۔جسٹس عمر عطا بندیال دا کہنا اے کہ سیاسی جماعتاں نوں فریق بنان لئی ایڈیشنل اٹارنی جنرل نے نکتہ چُکیا سی ، جمہوریت لئی قنون دی حکمرانی لازمی اے، قنون دی حکمرانی دے بغیر جمہوریت نہیں چل سکدی، سیاسی درجہ حرارت اینہا ودھ ہوئے گا تے مسائل ودھن گے۔فاروق ایچ نائیک نے دلائل دیندیاں ہویاں آکھیا کہ ملک وچ ایس ویلے انارکی تے فاشزم اے، عدالت ساہنوں موقع دیوے تے کیس تیار کراں گے، چیف جسٹس نے آکھیا کہ آپ سینئر وکیل نیں، کیس تے تہاڈے دل وچ اے، کل وی آکھیا سی کہ قنونی معاملہ خلا وچ حل نہیں کیتا جا سکدا، معاشرے تے سیاسی قیادت وچ ڈسپلن دی لوڑ اے ۔فاروق ایچ نائیک دا کہنا سی کہ آئین زندہ دستاویز اے، تشریح زمینی حالات اُتے ہی ہوسکدی اے، موجودہ حالات وچ جمہوریت تے ملک لئی کیہ بہتر اے اوہ تعین کرنا اے۔اوہناں نے ہور آکھیا کہ سیاسی جماعتاں اسٹیک ہولڈرز نیں، اوہناں نوں لازمی سنیا جائے، جسٹس جمال مندوخیل نے پچھیا کہ ایہ سوال پارلیمنٹ وچ کیوں نہیں کیتا جاندا، جس اُتے فاروق نائیک نے آکھیا کہ معاملہ پارلیمان وچ چُکن دا وی سوچ رہے ہاں۔