آئین دامذاق اُڑایا جا رہیا اے، وزیراعظم

اسلام آباد(پنجابی میڈیاگروپ)وزیراعظم شہباز شریف نے آکھیا اے کہ اج آئین دا سنگین مذاق اُڑایا جا رہیا اے، مقننہ، عدلیہ دے اختیاراں دیاں دھجیاں بکھیریاں جا رہیاں نیں، اک لاڈلہ کسی عدالت سامنے پیش نہیں ہُندا ۔قومی اسمبلی نال خطاب کر دیاں وزیراعظم شہباز شریف نے آکھیا کہ 2023 وچ 1973 دے آئین نوں بنیاں 50 وَرھے لَنگ گئے نیں، آئین دے50ورھے مکمل ہون اُتے پوری قوم نوں مبارکباد پیش کردا ہاں ۔ اوہناں نے آکھیا کہ ایس آئین نے ساڈی مذہبی روایت دے نال نال چاراں صوبیاںنوں اک لڑی وچ پرورکھیا اے،1973دے آئین اُتے شہید ذوالفقار علی بھٹو تے سیاسی رہنماواں دیاں کوششاں ناقابل فراموش نیں، ذاتی پسند تے ناپسند اک پاسے رکھ کے آئین بنایا گیا ۔ اوہناں نے آکھیا کہ جَد اسیں اپوزیشن وچ ساں تے ساڈے خلاف بددیانتی نال جھوٹے مقدمے بنائے گئے، اک قوم دی بیٹی نوں چاند رات گرفتارکیتا گیا کسی نے نوٹس نہیں لئیا،اج اک لاڈلہ لَت اُتے لَت رکھ کے تکبر دے نال گل کردا اے، قنون تے آئین نوں اوس نے ردی دی ٹوکری وچ پا دتا اے، ایہ اوہی لاڈلہ اے جس نے پارلیمنٹ اُتے دھاوا بولیا سی ، اوس دے حواریاں نے سپریم کورٹ دے باہر گندے کپڑے لٹکائے سن مگر ایس دے باوجود تنخواہ جیب وچ پاندا رہیا ۔ وزیراعظم نے آکھیا کہ اک لاڈلہ کسی عدالت سامنے پیش نہیں ہُندا، چاہے کِنے وی نوٹس ملدے نیں اوس نوں آناََ فاناََ رات دے اندھیرے وچ مختلف عدالتاں وچ ایکسٹینشن ملدی اے، اوہ عدلیہ دا مذاق اڑاندا اے ، اک سٹنگ خاتون جج بارے اُوس نے کیہ آکھیا، کسی نے نوٹس نہیں لئیا۔اوہناں دا کہنا سی کہ جَد اسیں اپوزیشن وچ ساںکس طریقے دے نال اپوزیشن دے زعما تے اوہناں دے خاندان دے لوکاں دے نال سلوک کیتا گیا، کس بددیانتی نال اوہناں دے خلاف جھوٹے مقدے بنا کے جیلاں وچ گھلیاگیا، کسی نے نوٹس نہیں لئیا، قوم دی بیٹی نوں باپ سامنے گرفتار کیتا گیا تے کسی نے نوٹس نہیں لئیا۔