حکومت نوں آکھیا جا رہیا اے کہ تُسی اج ہی قومی اسمبلی توڑ دیو،اعظم نذیر تارڑ

اسلام آباد(پنجابی میڈیاگروپ)وفاقی وزیر قنون سینیٹر اعظم نذیر تارڑ نے آکھیا اے کہ حکومت نوں آکھیا جا رہیا اے کہ تُسی اجے ہی قومی اسمبلی توڑ دیو ۔میڈیا نال گل بات کردیاں ہویاں اوہناں نے دسیا کہ وزیراعظم نال ملاقات ہوئی، مشاورت دا دُوجا دور وی ہوئے گا، اینج دے حالات وچ اجتماعی دانش دے نال اگے ودھن دی لوڑ ہُندی اے، عدلیہ تے پارلیمان دا اپنا اپنا کردار اے، کجھ کم پارلیمنٹ نے کرنے نیں، کجھ کم نیں جیہڑے صرف عدلیہ کر سکدی اے۔وزیر قنون نے آکھیا کہ ملک وچ آئینی بحران اے نہ قنونی، صرف رویاں دا بحران اے، اک چھوٹی جیہی گل کیتی گئی اے کہ جَد تُسی قومی نوعیت دے مقدمیاں وچ بیٹھو تے سینئر موسٹ ججاں نوں بٹھان یا فل کورٹ بنان ۔اعظم نذیر تارڑ نے آکھیا کہ صوابدیدی اختیاردے خلاف سپریم کورٹ اندروں ہی آواز آگئی، ایس موقع اُتے صحافی نے سوال کیتا کہ کیا سول سوسائٹی دے کجھ ارکان حکومت تے پی ٹی آئی دے وچکار مذاکرات دی کوشش کر رہے نیں؟صحافی دے سوال اُتے اوہناںنے آکھیا کہ امتیاز عالم، مجیب الرحمن شامی، حنا جیلانی، پاکستان بار کونسل دے وائس چیئرمین ہارون رشید بوہت چنگی کوششں کر رہے نیں، اگر تُسی ملک نوںاگے لے کے چلنا چاہندے او تے میرا خیال اے کہ اینج دی کوششں ہونی چاہیدی اے۔وزیر قنون نے آکھیاکہ حصیاں، ٹکڑیاں وچ الیکشن سیاسی بحران پیدا کرن گے، ملک نوں سیاسی استحکام دی لوڑ اے تاکہ معاشی استحکام آئے، وزیر قنون کوئی الیکشن توں نہیں نٹھ رہیا، بیٹھ کے اک طریقہ کار طے کر لئیا جائے تاکہ لیول پلئینگ فیلڈ ملے۔