کارکناں اُتے تشدد، ملوث لوکاں اُتے امریکا، برطانیہ، یورپ وچ پابندی لگواواں گے:فواد چودھری

اسلام آباد(پنجابی میڈیاگروپ)پاکستان تحریک انصاف دے مرکزی رہنما فواد چودھری نے آکھیا اے کہ پاکستان بینک کرپٹ ہون جارہیا اے، ہوش توں کم لین،کیا ایہ دوبارہ پاکستان نوں فیٹف دی لسٹ وچ شامل کروان گے؟اوورسیز پاکستانی ساڈی بیک بون نیں ۔ اسلام آباد وچ پریس کانفرنس کردیاں ہویاں سابق وزیر اطلاعات فواد چودھری نے آکھیا اے کہ 10اپریل توں لے کے21 مارچ تک انسانی حقوق دیاں خلاف ورزیاں ہوئیاں، برطانوی شہری شاہد حسین نوں کل رہا کر دتا گیا، برطانوی شہری نوں رہا کرن اُتے معافی منگی گئی، کیا پاکستانیاں دے کوئی حقوق نہیں نیں، اظہر مشوانی پاکستانی نیں ایس لئی اوس دا کوئی اتا پتا نہیں، اوہناں نوں لاپتا ہویاں5 دن ہو گئے نیں ۔فواد چودھری نے آکھیا کہ کل 10 ورھے دے بال نوں چُک کے جوڈیشل ریمانڈ اُتے گھل دتا گیا، عمران خان دے خلاف 15 مقدمے اک دن وچ درج کیتے گئے، اوہناں دے خلاف کیساں دی تعداد 143 ہو گئی اے، انسانی حقوق دیاں خلاف ورزیاں دی رپورٹ انٹرنیشنل اداریاں، ڈپلومیٹک نوں گھل دتی اے، نگران وزیراعلی، آئی جی اسلام آباد تے آئی جی پنجاب دے خلاف رپورٹ عالمی اداریاں نوں گھل رہے ہاںجس طرح نریندر مودی دی امریکا وچ پابندی ایسی طرح اینہاں اُتے لگے گی، ضیاالحق دے دور وچ اینج ہویا سی، برطانیہ، یورپی یونین، امریکا توں اوہناں دے خلاف قرارداداں آن گیاں، قرارداداں وچ اینہاں دے ویزیاں دی منسوخی دا مطالبہ کیتاجائے گا، نگران حکومت، آئی جی پنجاب نوں ناپسندیدہ شخصیت قرار دلواواں گے۔