حکم نہ منیا گئیا تے الیکشن کمیشن نوں ریفرنس گھلاں گے‘ فواد چوہدری

لہور( پنجابی میڈیاگروپ) پاکستان تحریک انصاف دے مرکزی سینئر نائب صدر فواد چوہدری ہوراں آکھیا اے کہ وفاقی کابینہ دے اجلاس وچ رَلت کرن والیاں نے آئندہ 12گھنٹیاں اندر خود نوں سپریم کورٹ دا فیصلہ نہ منن دے اعلامیے توں وَکھ نہ کیتیا تے اوہناں نوں ڈی سیٹ کرن لئی الیکشن کمیشن نوں ریفرنس گھلیا جائے گا ،پنجاب وچ الیکشن دے حوالے نال اگر سپریم کورٹ دے حکم مطابق پیشرفت نہیں ہُندی تے آرٹیکل204وچ نا اہلی ہونی اے تے اوس دے نال3 ورھے دی سزا وی ہو سکدی اے ، محکمہ داخلہ دے افسراں کول جے آئی ٹی بنان دا اختیار ہی نہیں تے لہور ہائیکورٹ نے ساڈی درخواست اُتے سوموار لئی نوٹس جاری کر دتے نیں۔ لہور ہائیکورٹ وچ میڈیا نال گل کردیاں ہویاں فواد چوہدری نے آکھیا کہ سپریم کورٹ دا فیصلہ پاکستان دے ہر اوس فرد دی جت اے جیہڑا آئین ،قنون تے اداریاں اُتے یقین رکھدا اے ، سپریم کورٹ دے چیف جسٹس پنجواں دن اے سوشل میڈیا اُتے ٹاپ ٹرینڈ کر رہے نیں ،ہُن اوہ عوامی چیف جسٹس بن چکے نیں ، سپریم کورٹ دے ججاں نے جیہڑی عزت تے تکریم کمائی اے اوس دی پاکستانی تریخ وچ بوہت گھٹ مثال ملدی اے۔