اک شخص دی ہٹ دھرمی کسی صورت قبول نہیں کراں گے، رانا ثناء اللہ

پنڈی (پنجابی میڈیاگروپ) پاکستان مسلم لیگ (ن )دے رہنما تے وفاقی وزیر داخلہ رانا ثنا اللہ نے آکھیا اے کہ اک شخص دی ہٹ دھرمی کسی صورت قبول نہیں کراں گے، الیکشن ضرور ہون گے لیکن اپنے ویلے اُتے ہون گے، اسیں الیکشن توں گھبران والے نہیں، جنہاں الیکشاں اُتے سیاسی جماعتاں، الیکشن کمیشن تے باقی اداریاں دا اتفاق نہ ہوئے تے اوہ کِداں ہو سکدے نیں۔وکلا ء کنونشن نال خطاب کردیاں ہویاں رانا ثنا اللہ نے آکھیا کہ ایس عظیم الشان وکلاء کنونشن دے انعقاد اُتے پنڈی ڈویژن دے وکلاء لائرز نوں مبارکباد تے شاباش دیندا ہاں ۔اوہناں نے آکھیاکہ اسیں الیکشن توں گھبران والے نہیں، جنہاں الیکشناں اُتے سیاسی جماعتاں، الیکشن کمیشن تے باقی اداریاںدا اتفاق نہ ہوئے تے اوہ کداں ہو سکدے نیں۔اوہناں نے آکھیا کہ متنازع طریقے نال الیکشن کران دی کوشش کیتی جا رہی اے۔وزیر داخلہ نے آکھیا کہ اسیں ہمیشہ ووٹ دی طاقت نال اقتدار وچ آئے سلیکٹ نہیں ہوئے۔وفاقی وزیر نے آکھیا کہ ملک وچ ایس توں پہلاں 71 تے 77 دے الیکشن تباہی تے ملک نوں دو لخت کرن دا باعث بنے،ایس لئی ساڈی رائے اے کہ ایس الیکشن نوں افہام و تفہیم نال کرایا جائے ۔وفاقی وزیر قنون و انصاف سینیٹر اعظم نذیر تارڑ نے خطاب کردیاں ہویاں آکھیا کہ مریم نواز نوں وکیلاں دے درمیان خوش آمدید کہندا ہاں ، اج وکیلاں نے جس جذبے تے ولولے نال اپنی قائد دا استقبال کیتا اے ، پاکستان بھر دے نڈر ،بے باک وکیلاں ولوں عدل دے ایواناں نوں پیغام دے دتا گیا اے کہ ترازو دے پلڑے برابر تولو ۔