اسیں تخت لہوراُتے بیٹھ کے غیر جمہوری قوتاں نوں جواب دیاں گے، بلاول بھٹو

گمبٹ(پنجابی میڈیاگروپ)وزیر خارجہ بلاول بھٹو زرداری نے آکھیا اے کہ وزیر اعلی سندھ اپنا کم جاری رکھن،اسیں تخت لہور جا کے بیٹھاں گے تے غیر جمہوری قوتاں نوں جواب دیاں گے۔پیر عبدالقادر شاہ جیلانی انسٹی ٹیوٹ آف میڈیکل سائنس گمبٹ وچ پاکستان دے پہلے پھیپھڑیاں دی پیوند کاری دے شعبے دی افتتاحی تے ملک دی پہلی ہیلتھ سٹی تے دوایاںدے یونٹ دے سنگ بنیاد دی تقریب نال خطاب کردیاں ہویاں وزیر خارجہ نے آکھیا کہ سپریم کورٹ دے جج اپنے اختیار ساتھیاں نوں شیئر کرن نوں تیار نہیں، آصف زرداری نے صدر ہُندیاں ہویاں اپنے اختیار پارلیمان نوں دتے۔ بلاول بھٹو نے آکھیا کہ آصف زرداری نے سی پیک شروع کیتا، اوہناں عدالتاں نے قائد عوام نوں پھانسی اُتے چڑھایا، ایہ جج لیکچر دیندے نیں کیہڑا کرپٹ تے کیہڑا سیسلین مافیا اے،اسیں نہیں مَن دے ایس ملک وچ کوئی انصاف دا ادارہ اے، بھٹو دی تیجی نسل انصاف منگ رہی اے، بھٹو مسلم امہ دا قائد رہیا اے،اج تک کسی جج نے شہید بھٹو دا کیس نہیں سُنیا ۔ اوہناں نے آکھیا کہ ایہ جیہڑے ادارے نیں کٹھ پتلی، بزدل رہے نیں، اوہناں نوں مشرف نظر نہیں آندا، سلیکٹڈ راج ذریعے نااہل وزیراعظم مسلط کیتا گیا جس پاروںاج معاشی بحران اے، جَد اوس نوں مسلط کیتا گیاتے کیا ایہ جج اندھے سن؟ اوس ویلے تہاڈا ازخود نوٹس کیتھے سی؟بلاول بھٹو دا کہنا سی کہ فریال تالپورنوں جَد عید دی رات گھسیٹ کے جیل وچ سُٹیا گیا کیتھے سی سوموٹو نوٹس؟ جَد عمران بجٹ پاس کران لئی آئی ایس آئی نوں استعمال کردا سی کیا تُسی اندھے سو؟تخت لہور دی لڑائی پاکستان نوں لے ڈوبے گی۔اوہناں نے آکھیا کہ اگر اسیں صرف شریفاں دی سیاست کرنی اے تے فیر 3 اگلیاں نسلاں وی قائد عوام لئی انصاف منگدیاں رہن گیاں، پاکستان پیپلز پارٹی جمہوری پارٹی اے، دُوجے اداریاں وچ کجھ شخص ضد اُتے سیاست کھیڈ رہے نیں، اگر سیاست کرنی اے تے فیر سیاست دی تیاری پھڑو ۔ وزیر خارجہ دا کہنا سی کہ ہر غیر جمہوری واردا جواب دیاں گے، پاکستان نوں ون یونٹ، 18ویں ترمیم نوں ریپ اپ کرن لئی اج وی اوسی ڈاکٹرائن نوں چاہن والے ہر ادارے وچ موجود نیں۔بلاول بھٹو نے آکھیا کہ ایس سازش نوں بے نقاب کرن لئی تیار نیں، سندھو حکومت نوں ہدایت جاری کردیاں ہویاں اوہناں نے آکھیا کہ تخت لہور دی لڑائی پاروں سندھ دے ترقیاتی کماں اُتے کوئی فرق نہیں ہینا چاہیدا اے۔