چھیتی خوشخبری دیاں گے، پرویز الہی

لہور(پنجابی میڈیاگروپ)تحریک انصاف دے صدر تے سابق وزیراعلی پنجاب چودھری پرویز الہی ہوراں آکھیا کہ پرانے اتحادیاں دے نال گل بات اگے وَدھ رہی اے، چھیتی خوشخبری دیاں گے، اوہ وی تسلیم کردے نیں اسیں وی تسلیم کردے ہاں کہ غلطیاں دوناں پاسیوں ہویاں نیں۔صدر پی ٹی آئی چودھری پرویز الہی نال سپیکر پنجاب اسمبلی سبطین خان تے سابق صوبائی وزرا سردار آصف نکئی، محمد ہاشم ڈوگر تے فیاض الحسن چوہان نے ملاقات کیتی جس وچ سپریم کورٹ دے حالیہ فیصلے دے بعد دی سیاسی صورتحال اُتے تبادلہ خیال کیتا گئیا۔ایس موقع اُتے چودھری پرویز الہی نے آکھیا کہ سپریم کورٹ دے واضح فیصلے نے الیکشن دی راہ وچ حائل ساریاں رکاوٹاں دور کر دتیاں نیں، کابینہ دی مجال نہیں کہ سپریم کورٹ دے حکم اُتے عملدرآمد دی راہ وچ رکاوٹ بن سکے، ہں جیہڑاآئین تے سپریم کورٹ حکم دی خلاف ورزی کرے گا اوہ گھر جائے گا۔اوہناں نے آکھیا کہ پارلیمنٹ وچ اعلی عدلیہ دے ججاں دی ذاتیات نوں زیر بحث نہیں لیایا جا سکدا، پارلیمنٹ وچ ججاں دی ذاتیات اُتے حملے آئین دی کھلی خلاف ورزی اے، عدلیہ دے پَر کٹن دی کوشش کرن والیاںدے اپنے پر کٹ چکے نیں، نواز شریف ہُن لندن وچ بیٹھ کے اپنے زخم ہی چٹدے رہن گے۔ پرویز الہی نے آکھیا کہ صدر علوی نے عدلیہ دے خلاف بل اُتے دستخط نہ کرکے دانش مندانہ فیصلہ کیتا۔ شہباز شریف نوں صدرعلوی توں تکلیف ایہ اے کہ اوہناں نوں غیر آئینی کماں اُتے ٹوکدے تے روکدے کیوں نیں، عدلیہ دے خلاف حکومت دا ہرغیر آئینی بل اپنی موت آپ مر جائے گا۔سابق وزیراعلی دا ہور کہنا سی ایم کیو ایم تے جی ڈی اے عدلیہ خلاف پی ڈی ایم دیاں سازشاں دا حصہ نہیں بنن گیاں۔