ساہنوں اندازہ نہیں سی حالات اینہے مشکل ہون گے،وزیراعظم

اسلام آباد(پنجابی میڈیا گروپ)قومی اسمبلی نے آئین پاکستان دی گولڈن جوبلی اُتے قرارداد متفقہ طوراُتے منظور کر لئی جس وچ10 اپریل نوں یوم دستور منان دا اعلان کیتاگیا اے، یوم دستور ہر سال ملک بھر وچ منایا جائے گا، یوم دستور عوام تے ملک لئی آئین تے اوس دی اہمیت توں آگاہ کرے گا، ریاستی ادارے 1973 دے آئین اُتے مکمل عمل درآمد کرن ، ریاستی ادارے اوہ سارے ضروری اقدام کرن جنہاںنال عوام دے حقوق تے مفادات دا تحفظ ہوئے ،ریاستی ادارے اوہ سارے ضروری اقدام کرن جنہاں نال دفاع نوں یقینی بنایا جا سکے جدکہ وزیراعظم شہباز شریف نے آکھیا اے کہ اپوزیشن نے 1ورھے پہلاں آئینی شق نوں استعمال کر کے پاکستان نوں مشکلاں توں بچان دی کوشش کیتی، ساہنوں اندازہ نہیں سی کہ حالات اینہے مشکل ہون گے،کسی نے آکھیا اتحادی حکومت 1مہینہ نہیں چل سکدی تے اج 1ورھا ہوگئیا اتحادی حکومت چل رہی اے،آئین بنان والیاں نوں وی سلام پیش کردا ہاں جنہاں نے مشاورت دا رستہ بنایا تے پاکستان نوں آئین دتا،1973 دے آئین وچ مختلف اوقات وچ ترمیم کیتی گئی، ڈکٹیٹر شپ دے زمانے وچ ترمیم کیتی گئی ، اج وی آئین زندہ اے، 1 چیف جسٹس نے بغیر پچھیاں ڈکٹیٹر نوں 3 ورھیاں دی رعایت دتی ،آئین پاکستان نوں ری رائٹ وی کیتا گئیا۔ پیر نوں دستورِ پاکستان دے50 ورھے مکمل ہون اُتے قومی اسمبلی دے خصوصی اجلاس وچ منعقدہ کنونشن وچ گل بات کردیاں ہویاں وزیراعظم نے آکھیا کہ اج دا دن پاکستان دی تریخ وچ اک بوہت اہم دن اے۔اوہناں نے آکھیاکہ مختلف شعبہ ہائے زندگی نال تعلق رکھنے والے معزز حاضرین ایس گل دی گواہی دے رہے نیںکہ50ورھے لنگن دے باوجودتے1973 دے آئین وچ کئی ترمیماں دے باوجود ایہ آئین اج وی زندہ اے۔اوہناں نے آکھیا کہ 50 ورھے پہلاں پاکستان دے اوہ سیاسی زعما جیہڑے اپنے اختلافات تے سیاسی نظریات دی بنیاداُتے شاید نہ مل بیٹھدے لیکن پاکستان وچ آئین دی حکمرانی، عدل و انصاف دے بول بالا لئی اوہناں نے اپنے اختلافات اک پاسے کردتے تے مل بیٹھے۔شہباز شریف نے آکھیا کہ اوہناں نے جس اجتماعی بصیرت، خلوص تے دل دی گہرائی نال جیہڑی محنت کیتی ایس دا ثمر آئین دی صورت وچ نکلیا۔اوہناں نے آکھیا کہ ایہ اینج دا تریخی کارنامہ اے کہ جیہڑا ہمیشہ سنہرے حرفاں وچ یاد رکھیا جائے گا، اج دا دن انتہائی اہم اے جیہڑا ساہنوں یاد دلاندا اے کس طرح1955وچ نظریہ ضرورت نوں ایجاد کیتا گیا تے کس طرح اک چیف جسٹس نے اک ڈکٹیٹر نوں بغیر پچھیاں3ورھیاں دی رعایت دے دتی ۔ وزیراعظم نے آکھیا کہ آئین پاکستان نوں ری رائٹ وی کیتا گیا۔اوہناں نے آکھیاکہ میں ایہ نہیں کہندا کہ سیاست داناں وچ خامیاں نہیں لیکن جس طرح1973 آئین بنان والے مل بیٹھے تے تریخ رقم کیتی ایسی طرح پاکستان دی اپوزیشن نے 1ورھے پہلاںآئین دی 1شق استعمال کردیاں ہویاں پاکستان نوں مشکلاں توں بچان دی کوشش کیتی۔ اوہناں نے آکھیاکہ ساہنوں اندازہ نہیں سی کہ حالات اینہے مشکل ہون گے، کسی نے آکھیا اتحادی حکومت 1 مہینہ نہیں چل سکدی تے اج 1سال ہوگئیا ایہ اتحادی حکومت چل رہی اے۔وزیراعظم نے آکھیا کہ مشکلاں نیں، غلطیاں وی ہون گیاں کوتاہیاں وی ہون گیاں لیکن جَد تُسی ٹھان لوو کہ مل کے کم کرنا معاملات نوں چلانا اے تے وڈے وڈے چیلنجز عبور ہوجاندے نیں۔اوہناں نے آکھیاکہ آئین بنان والیاں نوں سلام پیش کردا ہاں جنہاں نے مشاورت دا رستہ بنایا تے پاکستان نوں آئین دتا۔اوہناں نے آکھیا کہ اسیں ساریاں ترمیماں دے باوجود تے کئی وار وڈے وڈے طوفان آئے لیکن ایہ اوہ آئین اے کہ جس نے چاراں اکائیاں نوں اک لڑی وچ پرو کے رکھیا اے۔