فاشسٹ حکومت نے آئین نوں دفن کردتا‘فوادچوہدری

لہور(پنجابی میڈیا گروپ)پاکستان تحریک انصاف دے مرکزی سینئر نائب صدر فواد چوہدری نے آکھیا اے کہ آئین نال الیکشن نوں ختم کرن دا مطلب آئین نوں ختم کرنا اے تے اج فاشسٹ حکومت نے آئین نوں دفن کر دتا اے، شہباز شریف تے وفاقی حکومت نہ صرف سپریم کورٹ دی حکم عدولی دے مرتکب ہوئے نیں بلکہ اینہاں اُتے آرٹیکل6دا مقدمہ وی بنایا جا سکدا اے، جیہڑے لوگ قنون دی حکمرانی تے آئین بچان دی کوشش وچ شامل نہیں ہون گے اوہناں دیاں آن والیاں نسلاں وی اوہناں توں شرمندہ ہون گیاں۔لہور ہائیکورٹ وچ مختلف کیساں وچ پیشی دے موقع اُتے پارٹی دے سینئر مرکزی رہنما ہمایوں اختر خان تے مسرت جمشید چیمہ دے ہمراہ میڈیا نال گل کردیاں ہویاں فواد چوہدری نے آکھیا کہ اسیں ا لیکشن کمیشن دے آرڈر جس وچ نگران پنجاب حکومت نوں مرضی نال تقرریاں تے تبادلیاں دے اختیار دتے گئے نیں اوس نوں چیلنج کیتا اے تے ایس اُتے لہور ہائیکورٹ نے نوٹس جاری کر دتا اے ،اسیں نگران وزیر اعلیٰ دے خلا ف توہین عدالت وچ وی جارہے ہاں ، نگران وزیر اعلیٰ اینج دیاں گلیاں تے سڑکاں دے افتتاح لئی اجلاس کر رہے نیں جِداںاوہ منتخب وزیر اعلیٰ ہون ۔