الیکشن فنڈز دی عدم فراہمی، حکم عدولی دے نتائج سب نوں معلوم نیں: سپریم کورٹ

اسلام آباد( پنجابی میڈیا گروپ)پنجاب وچ الیکشن لئی فنڈز دی عدم فراہمی اُتے سپریم کورٹ نے اٹارنی جنرل، گورنر اسٹیٹ بینک، سیکرٹری خزانہ تے سیکرٹری الیکشن کمیشن نوں نوٹس جاری کر دتے ۔عدالت عظمی ولوں جاری نوٹس وچ آکھیا گیا اے کہ الیکشن کمیشن دی رپورٹ دے مطابق وفاقی حکومت نے فنڈز فراہم نہیں کیتے، فنڈز دی عدم فراہمی عدالتی حکم دی حکم عدولی اے، عدالتی حکم عدولی دے نتائج قنون وچ واضح تے سب نوں معلوم نیں، چیف جسٹس نے ساریاں افسراں نوں14اپریل نوں چیمبر وچ سَدھ لئیا ۔ سپریم کورٹ نے آکھیا کہ عدالتی حکم عدولی کرن تے اوس اُتے اُکسان والیاں دے خلاف کارروائی ہو سکدی اے، ویلے اُتے الیکشن نہ کروانا آئین نوں خطرے وچ پانا اے، الیشن ورگے اہم ترین معاملے اُتے فنڈ جاری نہ کرنا فوری توجہ دا طلبگار اے، عدالتی حکم اُتے من و عن عملدرآمد یقینی بنایا جائے، گورنر سٹیٹ بینک حکومت دے سارے پیسے دی تفصیل ہمراہ لیان ۔نوٹس وچ ہورآکھیا گیا اے کہ الیکشن لئی فنڈز دی فراہمی توہین عدالت دی کارروائی توں وَدھ اہم اے، دسیا جائے کہ سپریم کورٹ دے حکم اُتے عمل کیوں نہیں کیتا گیا، عدالت عظمی نے گورنر اسٹیٹ بینک نوں دستیاب وسائل بارے تفصیل ہمراہ لیان، سیکرٹری خزانہ نوں وی سارے ریکارڈ نال لیان دی ہدایت جاری کردتی ۔ واضح رہے سپریم کورٹ نے وفاقی حکومت نوں 10 اپریل تک پنجاب وچ الیکشن لئی21 ارب روپے دے فنڈز جاری کرن دا حکم دتا سی ، مقررہ مدت ختم ہون تک حکومت ولوں الیکشن کمیشن نوں رقم جاری نہیں کیتی گئی، حکومت نے الیکشن کمیشن نوں عام الیکشن لئی فنڈز دین دی بجائے انتخابی اخراجات دا بل پارلیمنٹ وچ پیش کر دتا۔الیکشن کمیشن نے پچھلے دناں سپریم کورٹ وچ فنڈز دی عدم فراہمی بارے رپورٹ جمع کروا دتی سی، اک صفحہ اُتے مشتمل رپورٹ چیف جسٹس عمر عطا بندیال نوں پیش کیتی گئی، جس وچ عدالت نوں دسیا گیا اے کہ پنجاب وچ الیکشن لئی حکومت ولوں واضح حکم دے باوجود فنڈز دتے گئے نہ ہی مطلوبہ سکیورٹی فورس فراہم کیتی گئی اے۔ دُوجے پاسے سپریم کورٹ دے حکم بعد الیکشن کمیشن آف پاکستان نے 14 مئی نوں پنجاب وچ عام الکشن کروان دا فیصلہ کردیاں ہویاں آکھیا سی کہ عدالت عظمی دے فیصلے پر من وعن عمل کیتا جائے گا، الیکشن کمیشن الیکشن کروان لئی تیار اے، الیکشن کمیشن ولوں پنجاب وچ عام الکشن دے انعقاد دے سلسلے وچ شیڈول وی جاری کر دتا گیا اے۔شیڈول مطابق پنجاب وچ عام الیکشن لئی نویں کاغذات نامزدگی نہیں وصول کیتے جان گے، پرانے شیڈول تحت کاغذات نامزدگی اُتے ہی اعتراض عائد کیتا جا سکے گا، پولنگ 14 مئی نوں ہوئے گی، کاغذات نامزدگی بارے ریٹرننگ افسر دے فیصلے دے خلاف اپیل دائر کرن دی آخری تریخ 10 اپریل ہوئے گی، الیکشن ٹریبونل 17 اپریل تک اپیلاں اُتے فیصلہ کرے گا۔امیدواراں دی نویں لسٹ شائع کرن دی آخری تریخ 18، کاغذات نامزدگی واپس لین دی آخری تریخ 19 اپریل ہوئے گی، امیدواراں نوں انتخابی نشان 20 اپریل نوں الاٹ کیتے جان گے۔