تنویر الیاس دے بعد شہباز شریف دے نااہل ہون دی واری اے: پرویز الٰہی

لہور(پنجابی میڈیا گروپ)پاکستان تحریک انصاف دے مرکزی صدر و سابق وزیراعلی پنجاب چودھری پرویز الٰہی دا کہنا اے کہ سردار تنویر الیاس دے بعد ہُن شہباز شریف دے نااہل ہون دی واری اے۔مرکزی صدر پاکستان تحریک انصاف چودھری پرویزالہی نال سابق صوبائی وزیراں چودھری ظہیر الدین، سردار وقاص ، چودھری شبیر گجر، چودھری نوید گوندل، چودھری مختار گوندل تے آصف عرفان نے ملاقات کیتی، ملاقات وچ سیاسی صورتحال تے الیکشن دیاں تیاریاں دے حوالے نال گل بات کیتی گئی۔چودھری پرویز الہی دا کہنا سی کہ شہبازشریف توہین عدالت دے نال نال حکم عدولی وی کر چکے نیں، حکومت دے خلاف الیکشن کمیشن دی رپورٹ ارتکاب جرم دا دستاویزی ثبوت اے، نگران وزیراعلی مطلوبہ الیکشن سکیورٹی فراہم نہ کرن اُتے جیل وی جا سکدے نیں، توہین عدالت دے مجرم کسی معافی دے مستحق نہیں۔سابق وزیراعلی نے وزیر خزانہ اسحاق ڈار نوں وی کڑی تنقید دا نشانہ بنادیاں ہویاں آکھیا کہ اسحاق ڈار پاکستان نوں ڈیفالٹ کران دے مشن اُتے آئے نیں، نوازشریف نے اسحاق ڈار نوں اپنا ملک دشمن ایجنڈا دے کے پاکستان گھلیا ہویا اے، غریب آٹے لئی تے مریض دوائیاں لئی مر رہے نیں، مارکیٹ توں جان بچان والیاں دوائیاں تیزی نال ختم ہو رہیاں نیں۔