حکمران اتحاد نے عدالتی اصلاحات بل اُتے تاحکم ثانی عمل روکن دا حکم مسترد کر دتا

اسلام آباد(پنجابی میڈیا گروپ)حکمران جماعتاں نے سپریم کورٹ پروسیجر اینڈ پریکٹس بل اُتے تاحکم ثانی عمل روکن دا حکم مسترد کر دتا۔حکمران اتحاد نے سپریم کورٹ دے 8 رکنی بینچ دے فیصلے اُتے شدید ردعمل دیندیاں ہویاں آکھیا کہ پہلی وار ہویا قنون اجے بنیا وی نہیں یک طرفہ بینچ بنا کے اوس نوں جنم لین توں ہی روک دتا گیا اے۔اعلامیہ وچ آکھیاگیا اے کہ محض اک اندازے تے تصوردی بنیاد اُتے ایہ کم کیتا گیا، ایہ طریقہ صرف مروجہ قنونی طریقہ کار ہی نہیں منطق دے وی خلاف اے، ایہ مفادات دے ٹکرا دی کھلی تے سنگین ترین مثال اے۔حکمران اتحاد دا کہنا اے کہ ایہ عدل وانصاف تے سپریم کورٹ دی ساکھ دا قتل اے، ’’ون مین شو‘‘ دا شاخسانہ عدالتی تریخ وچ سیاہ باب دے طور اُتے جگہ ملے گی۔اعلامیہ وچ آکھیا گیا اے کہ ایہ اقدام خلاف آئین تے پارلیمنٹ دا اختیار سلب کرنا اے،ایہ وفاق پاکستان اُتے حملہ تے سپریم کورٹ دے سینئر ترین ججاں اُتے وی عدم اعتماد اے۔حکمران اتحاد دے اعلامیہ وچ آکھیا گیا اے کہ حکمران جماعتاں ایس عدالتی ناانصافی نوں نامنظور کردیاں ہویاں ایس دی بھرپور مزاحمت کرن گیاں ۔اعلامیہ وچ آکھیا گیا اے کہ پاکستان بارکونسل تے صوبائی بار کونسلاں دے تحفظات وی درست ثابت ہوئے، امید کردے ہاں کہ پاکستان دی وکلا برادری آئین ، قنون تے عدل نال ہون والے ایس سنگین مذاق دا نوٹس لئے گی۔