پنجاب،کے پی الیکشن اخراجات21ارب روپے فراہمی دا بل مسترد

اسلام آباد(پنجابی میڈیا گروپ) پنجاب تے کے پی وچ الیکشن دے اخراجات دی فراہمی دے معاملے اُتے قومی اسمبلی نے 21 ارب روپے دی فراہمی بارے بل مسترد کر دتا۔ سپیکر قومی اسمبلی راجا پرویز اشرف دی زیر صدارت قومی اسمبلی دے اجلاس وچ قائمہ کمیٹی برائے خزانہ دی رپورٹ پیش کیتی گئی، رپورٹ وچ الیکشن اخراجات برائے پنجاب و کے پی بل نوں مسترد کیتا گیا سی ۔وزیر خزانہ اسحاق ڈار نے پنجاب وچ الیکشن اخراجات بارے بل دی تحریک ایوان وچ پیش کیتی، جس نوں متفقہ طوراُتے مسترد کردتا گیا، اسحاق ڈار نے قومی اسمبلی وچ ٹیکس قنون ترمیمی بل وی پیش کیتا، ایوان نے بل دی شق وار منظوری دے دتی ۔ قومی اسمبلی اجلاس وچ مجموعہ ضابطہ فوجداری 1898 ترمیمی بل وی منظور کیتا گیا، مذکورہ بل احمد حسین ڈیہڑ نے پیش کیتا سی۔قومی اسمبلی اجلاس وچ ایم این اے سائرہ بانو دا کہنا سی کہ وزارت تعلیم تحت سرکاری گڈیاں دی تعداد بارے سوالاں دے جواب موصول نہیں ہوئے، پہلاں وی ایس بارے پچھے گئے سوال دے جواب موصول نہیں ہوئے، کیا ایہ اینہا مشکل سوال اے کہ جواب نہ دتا جا سکے۔ سپیکر قومی اسمبلی نے آکھیا کہ پہلاں وی رولنگ دتی سی کہ اگر جواب نہ ملیا ہوئے تے وجہ توں آگاہ ضرور کیتا جائے، سائرہ بانو سوالات دا جواب نہ آن اُتے براہ راست وزیراعظم نال مخاطب ہوگئیاں۔اوہناں نے شہباز شریف نوں آکھیا کہ تہاڈے وزیر کم نہیں کر رہے، وزیراں دی تعداد تاں بوہت زیادہ اے، سپیکر نے آکھیا کہ تُسی رکن پارلیمنٹ او، کسی نال براہ راست گل نہیں کر سکتاں، جس اُتے سائرہ بانو دا کہنا سی کہ وزیر کم نہیں کر رہے، ایس بارے میں آگاہ تاں کرن دیاں۔محسن لغاری نے قومی اسمبلی وچ اظہارخیال کردیاں ہویاں آکھیا کہ سپریم کورٹ نے حکومت نوں پیسے دین دا حکم دتا اے، ایس حوالے نال تے نوا بل لیان دی لوڑ ہی نہیں سی۔قومی اسمبلی وچ حج تے عمرہ ریگولیشن بل 2023 پیش کیتا گیا جس نوں قومی اسمبلی نے منظور کر لئیا، بل وزیر مملکت شہادت اعوان نے پیش کیتا۔