پہلاں یوسف رضا گیلانی نے نااہلی بُھگتی،ہُن شہباز شریف بُھگتے گا،عمران خان

لہور( پنجابی میڈیاگروپ)چیئرمین پاکستان تحریک انصاف و سابق وزیر اعظم عمران خان نے آکھیا کہ سپریم کورٹ دا فیصلہ نہ من کے حکمران غلط روایت پا رہے نیں ، توہین عدالت اُتے پہلاں یوسف رضا گیلانی نے نا اہلی بُھگتی، ہُن انشا اللہ شہباز شریف بُھگتے گا۔چیئرمین پاکستان تحریک انصاف عمران خان نال مرکزی صدر پی ٹی آئی چودھری پرویزالہی نے ملاقات کیتی، پنجاب وچ الیکشن لئی ٹکٹاں اُتے تفصیلی مشاورت تے ملکی سیاسی صورتحال اپتے گل بات کیتی گئی، عمران خان نے خصوصی طور اُتے مونس الہی دی خیریت وی دریافت کیتی۔ایس موقع اُتے گل بات کردیاں ہویاں عمران خان نے آکھیا کہ پنجاب تے خیبرپختونخوا دے وزرائے اعلی ولوں سپریم کورٹ وچ درخواست دائر کر رہے ہاں، خواجہ طارق، رحیم تے فواد چودھری پیروی کرن گے۔ملاقات دے بعد گل بات کردیاں ہویاں سابق وزیر اعلی پنجاب چودھری پرویز الہی نے آکھیا کہ پنجاب وچ امیدواراں اُتے تفصیلی مشاورت ہوئی اے، ٹکٹاں دااعلان عمران خان آپئی کرن گے، الیکشن روکن لئی ہر غیر آئینی ہتھکنڈہ استعمال کیتا جا رہیا اے۔ چودھری پرویزالہی نے آکھیا کہ نااہل حکمراناں نوں اپنے ہر غیر آئینی اقدام دا جواب دینا ہوئے گا، شہباز شریف کسی وی صورت اقتدار نال چمٹے رہنا چاہندے نیں چاہے اوہناں نوں آئین شکنی ہی کیوں نہ کرنی پئے ۔سابق وزیر اعلی پنجاب نے آکھیا کہ آئین شکن شوباز شریف قوم سامنے بری طرح ایکسپوز ہو چکیا اے۔