سپریم کورٹ دا حکومت نوں الیکشن لئی27اپریل تک فنڈز دین دا حکم

اسلام آباد( پنجابی میڈیا گروپ)سپریم کورٹ نے وزارت دفاع دی ملک بھر وچ اک نال الیکشن کروان دی درخواست ناقابل سماعت قرار دیندیاں ہویاں حکومت نوں27اپریل تک فنڈز جاری کرن دا حکم دے دتا ۔ سپریم کورٹ نے اپنے حکم نامے وچ آکھیا اے کہ درخواست گزار دے وکیل نے پر امن ، منصفانہ تے شفاف الیکشن اُتے زور دتا اے،درخواست گزار دے مطابق عام الیکشن وچ رَلت کرن والیاں سیاسی جماعتاں دے وچکار باہمی احترام تے مفاہمت ہونی چاہیدی اے۔درخواست گزار مطابق 1970,1977 دے الیکشن دے برعکس اک ویلے الیکشن ہون نال وَدھ بہتر نتائج نکلے۔ حکم نامے وچ آکھیا گیا اے کہ بادی النظر وچ درخواست گزار دا موقف مناسب اے۔عدالت نے ہور آکھیا کہ سیاسی مذاکرات نوں عدالت دے14 مئی دے حکم توں بچن دا ذریعہ نہیں بنایا جا سکدا، اسیں درخواست گزار دیاں کوششاں نوں سراہندے ہاں ۔ سپریم کورٹ نے الیکشن کمیشن تے وزارت دفاع دے الیکشن اکتوبر وچ کروان نوں ناقابل سماعت قرار دیندیاں ہویاں آکھیا کہ 14مئی نوں الیکشن کروان دا حکم حتمی ہو چکیا اے، قومی اسمبلی توں الیکشن لئی رقم دے بل مسترد ہون دے سنگین آئینی نتائج نیں ، بل مسترد ہون دا اک ممکنہ اثر ایہ اے کہ حکومت پارلیمان وچ اپنی اکثریت کھو چکی اے۔ سپریم کورٹ دے حکم نامے وچ ہور آکھیا گیا اے کہ اکثریت کھون دے ممکنات نوں اٹارنی جنرل نے یکسر مسترد کردتا اے۔ اٹارنی جنرل مطابق وزیر اعظم تے کابینہ اُتے پارلیمان دی اکثریت دا اعتماد اے ۔ سپریم کورٹ نے آکھیا اے کہ عدالتی حکم عدولی تے اوس توں انحراف دے سنگین نتائج نیں، اٹارنی جنرل عدالتی حکم عدولی دے نتائج بارے حکومت نوں دسن تاکہ اوس دا تدارک ہو سکے۔سپریم کورٹ نے اپنے حکم نامے وچ آکھیا کہ وزارت دفاع دی درخواست ناقابل سماعت ہون دی بنا اُتے نمٹائی جا رہی اے۔حکم نامے وچ آکھیا گیا اے کہ سیاسی مذاکرات نوں عدالت دے 14 مئی دے حکم توں بچن دا ذریعہ نہیں بنایا جا سکدا،اسیں درخواست گزار دیاں کوششاںنوں سراہندے ہاں، 14مئی نوں الیکشن کروان دا حکم حتمی ہو چکیا، اے جمہوریت اسمبلی وچ اکثریت دا اعتماد اے، الیکشن بل دے مسترد ہون دے سنجیدہ نتائج نیں، آئین مطابق وزیر اعظم نوں اسمبلی وچ اکثریت دا اعتماد لازمی اے، قومی اسمبلی توں رقم دے بل مسترد ہون دے سنگین آئینی نتائج نیں ۔ حکم نامے وچ آکھیا گیا اے کہ بل مسترد ہون دا اک ممکنہ اثر ایہ اے کہ حکومت پارلیمان وچ اپنی اکثریت کھو چکی اے، اکثریت کھون دے ممکنات نوں اٹارنی جنرل نے یکسر مسترد کردتا، اٹارنی جنرل مطابق وزیر اعظم تے کابینہ اُتے پارلیمان دی اکثریت دا اعتماد اے۔ ڈیماندڈ مسترد ہون دی صورت حال نوں چھیتی تبدیل کیتا جا سکدا اے جدکہ عدالتی حکم عدولی تے اوس توں انحراف دے سنگین نتائج ہوسکدے نیں ۔ سپریم کورٹ نے اپنے حکم نامے وچ لکھیا کہ اٹارنی جنرل عدالتی حکم عدولی دے نتائج بارے حکومت نوں دسن تاکہ اوس دا تدارک ہو سکے۔واضح رہے کہ18اپریل نوں وزارت دفاع نے سپریم کورٹ توں پنجاب وچ الیکشن دا حکم واپس لین تے ملک بھر وچ اک نال الیکشن کران دی استدعا کیتی سی ۔ وزارت دفاع نے اپنی درخواست وچ موقف اختیار کیتا سی کہ ات گرداں تے شرپسنداں ولوں انتخابی مہم اُتے حملیاں دا خدشہ اے، قومی،بلوچستان تے سندھ اسمبلیاں دی مدت پوری ہون اُتے ہی الیکشن کرائے جان۔وزارت دفاع نے اپنی رپورٹ وچ دسیا سی کہ الیکشن لئی 3 لکھ 85 ہزار توں وَدھ آرمڈ فورس تے رینجرز دے جواناں دی لوڑ ہوئے گی، سیاسی حالات دے پیش نظر وَدھ نفری دی لوڑ پہ سکدی اے۔ رپورٹ وچ آکھیا گیا سی کہ موجودہ صورت حال دی روشنی وچ پلس سیکیورٹی انتظاماں لئی ناکافی ہوئے گی جدکہ کے پی تے بلوچستان وچ جاری آپریشنز پاروں جواناں نوں فوری ہٹانا ممکن نہیں اے، اینہاں دوناں صوبیاں وچ آپریشنز پاروں ہی پنجاب تے سندھ دی صورت حال بہتر اے اگر جواناں نوں ہٹایا گیا تے پنجاب تے سندھ وچ امن و امان دی صورت حال خراب ہوجائے گی۔رپورٹ وچ دسیا گیا کہ اکتوبر دے شروع تک سیکیورٹی فورسز دستیاب ہوئے گی۔ایس توں پہلاں الیکشن کمیشن نے سپریم کورٹ نوں فنڈ نہ ملن سنے ساری صورت حال توں آگاہ کردیاں ہویاں رپورٹ سپریم کورٹ رجسٹرار نوں جمع کرادتی سی جدکہ اسٹیٹ بینک نے وی اپنی رپورٹ جمع کرائی سی جس وچ الیکشن کمیشن نوں رقم منتقل نہ کرن دی وجہ بیان کیتی گئی سی۔اسٹیٹ بینک نے سپریم کورٹ رجسٹرار وچ جمع کرائے گئے جواب وچ آکھیا سی کہ حکومت نے پارلیمنٹ ایکٹ تحت اسٹیٹ بینک نوں فنڈ توں روکیا اے۔ ایس دے علاوہ وزارت خزانہ نے وی اپنی رپورٹ اٹارنی جنرل آفس ذریعے جمع کرائی سی جس وچ وفاقی کابینہ دے فیصلے تے پارلیمان نوں معاملہ گھلن دی تفصیل شامل سی۔وزارت خزانہ دی رپورٹ وچ عدالتی حکم اُتے اسٹیٹ بینک نوں فراہم کردہ معاونت بارے وی آگاہ کیتا گیا سی جدکہ فنڈز منتقلی اُتے قنونی پہلواں نوں وی اُجاگر کیتا گیا سی۔