صدرنے پریکٹس اینڈ پروسیجر بل بغیر دستخط کیتیوں واپس گھل دتا

اسلام آباد( پنجابی میڈیا گروپ)صدر مملکت ڈاکٹر عارف علوی نے پریکٹس اینڈ پروسیجر بل 2023 دستخط کیتیوں بغیر واپس گھل دتا۔صدر نے موقف اپنایا اے کہ سپریم کورٹ دے فیصلے توں بعد بل دی توثیق اُتے عمل نہیں ہو سکدا، معاملہ سب توں وڈے عدالتی فورم سامنے زیر سماعت ہون پاروں ایس اُتے ہور ایکشن نہیں ہو سکدا۔واضح رہے حکومت نے پارلیمنٹ دے سانجھے اجلاس وچ پریکٹس اینڈ پروسیجر بل دُوجی وارمنظور کر کے صدر نوں گھلیا سی، بل دے خلاف درخواستاں دی سماعت دے بعد سپریم کورٹ نے ایس اُتے عملدرآمد روک دتا سی۔سپریم کورٹ پریکٹس اینڈ پروسیجر بل تحت سو موٹو نوٹس لین دا اختیار ہُن اعلی عدلیہ دے 3 سینئر ترین ججاں دے کول ہوئے گا ۔ ایس بل نوں قومی اسمبلی تے سینیٹ توں منظور کرائے جان دے بعد دستخط لئی صدر نوں گھلیا گیا سی۔بل تحت چیف جسٹس دا ازخود نوٹس دا اختیار محدود ہوئے گا، بنچاں دی تشکیل تے از خود نوٹس دا فیصلہ اک کمیٹی کرے گی جس وچ چیف جسٹس تے 2 سینئر ترین جج ہون گے، نویں قنون سازی تحت نواز شریف نوں از خود نوٹس اُتے ملی سزا اُتے اپیل دا حق مل گیا، یوسف رضا گیلانی، جہانگیر ترین تے ہور فریق وی فیصلیاں نوں چیلنج کر سکن گے۔