اتحادی جماعتاں دا حکومت دی مدت پوری ہون اُتے ہی الیکشن کران دافیصلہ

اسلام آباد(پنجابی میڈیا گروپ)وزیر اعظم شہباز شریف دی زیر صدارت ہون والے اتحادی جماعتاںدے اجلاس دا اعلامیہ جاری کردتا گیا۔اعلامیے مطابق حکومت وچ شامل اتحادی جماعتاں دا اجلاس وزیر اعظم ہائوس وچ ہویا، ایس دوران رَلتیاں نے وزیر اعظم شہباز شریف اُتے مکمل اعتماد دا اظہار کردیاں ہویاں ساریاں فیصلیاں دا اختیار اوہناں نوں تفویض کر دتا، اجلاس وچ موجودہ حکومت دی آئینی مدت مکمل ہون اُتے ہی ملک بھر وچ الیکشن کران دا متفقہ فیصلہ کیتا گیا۔وزیراعظم شہباز شریف دی زیر صدارت ہون والے اتحادی جماعتاں دے اجلاس وچ سپریم کورٹ نال محاذ آرائی لئی پارلیمنٹ نوں استعمال کرن دا فیصلہ کیتا گیا، اجلاس وچ توہین پارلیمنٹ اُتے اعلی عدلیہ نال تعلق رکھن والیاں3اہم شخصیتاں نوں نوٹس جاری کرن اُتے غور ہویا، نوٹس قومی اسمبلی دی استحقاق کمیٹی ذریعے جاری کیتے جان گے۔اجلاس وچ خاص طور اُتے سپریم کورٹ دے متنازعہ تے یک طرفہ بینچ دے فیصلیاں نال پیدا ہون والے امور اُتے مشاورت وی کیتی گئی، موجودہ حکومت دی آئینی مدت مکمل ہون اُتے ملک وچ اک ہی دِن الیکشن کران، مشاورتی عمل نوں اگلے مرحلے وچ لے جان، ایس ضمن وچ قائم کردہ کمیٹی دی مشاورت تے ہوراں سیاسی رابطیاں دے تناظر وچ مستقبل دی حکمت عملی اُتے غور ہویا۔اجلاس دے رَلتیاں آکھیا کہ موجودہ حکومت دی آئینی مدت مکمل ہون اُتے اک ہی دن ملک بھر وچ الیکشن کرانا بنیادی نکات نیں جیہڑی وی حکمت عملی طے ہوئے گی اوہناں دی بنیاد ایہی 2نکات ہون گے، اتحادی جماعتاں نے وزیر اعظم دی حمایت جاری رکھن دے عزم دا عہد کردیاں ہویاںآکھیا کہ شہباز شریف جیہڑا وی فیصلہ کرن گے، حکومتی اتحاد دیاں ساریاں جماعتاں اوس دا بھرپور ساتھ دیون گیاں۔