وزیراعظم تے چیف الیکشن کمشنر نوں عہدیاں توں ہٹان لئی درخواست دائر

اسلام آباد(پنجابی میڈیاگروپ)وزیراعظم شہبازشریف تے چیف الیکشن کمشنر سکندر سلطان راجا نوں عہدیاں توں ہٹان لئی سپریم کورٹ وچ درخواست دائر کردتی گئی ۔ ظہور مہدی فیصل نامی شہری ولوں عدالت عظمی وچ وزیراعظم شہباز شریف تے چیف الیکشن کمشنر خلاف دائر درخواست وچ وفاق، شہباز شریف، سکندر سلطان راجا، صدر عارف علوی تے مولانا فضل الرحمن نوں فریق بنایا گیا اے ۔ درخواست وچ آکھیا گیا اے کہ وزیراعظم شہباز شریف الیکشن فنڈز اجرا دا بل مسترد ہون نال قومی اسمبلی دا اعتماد کھو بیٹھے نیں، سکندر سلطان راجا دا الیکشن لئی فنڈزتے سکیورٹی دا تقاضا غیر مناسب اے۔ سپریم کورٹ توں استدعا کیتی گئی اے کہ قرار دتا جائے کہ شہبازشریف تے چیف الیکشن کمشنر الیکشن دے معاملے اُتے پارٹی بن چکے نیں، سپریم کورٹ نگران وزیر اعظم تے نگران چیف الیکشن کمشنر دی تعیناتی دا حکم دیوے، عدالت21ارب جاری کرن، فوج تے رینجرز بغیر الیکشن کران دا وی حکم دیوے۔