پنجاب وچ الیکشن لئی رقم نہیں دتی جا سکدی:اعظم نذیرتارڑ

اسلام آباد(پنجابی میڈیاگروپ)وزیر قنون اعظم نذیر تارڑ نے آکھیا اے کہ معزز ایوان ووٹ ذریعے حکم دے چکیا اے پنجاب وچ الیکشن لئی رقم نہیں دتی جا سکدی، ایہ آئینی اختیار معزز ایوان دا اے،قومی اسمبلی وچ اظہار خیال کردیاں ہویاں اعظم نذیر تارڑ نے آکھیا کہ تہاڈی اجازت نال اک اہم معاملہ پیش کرنا چاہندا ہاں، پنجاب، کے پی اسمبلیاں نوں اک شخص لئی انا دی بھینٹ چڑھایا گیا، لہور ہائی کورٹ وچ اجے پٹیشن پینڈنگ سی کہ9 رکنی بینچ بنایا گیا، 2 جج رضا کارانہ طور اُتے کیس توں وَکھ ہو گئے، 7وچوں4 معزز ججاں درخواستاں خارج کیتیاں سن ۔وفاقی وزیر قنون اعظم نذیر تارڑ نے آکھیا کہ ایوان نے قرارداد منظور کیتی ایہ اک سیاسی مقدمہ سی، معزز ایوان نے طے کر دتا سی ایوان4 ججاں دا فیصلہ من دا اے ، ایوان اقلیتی فیصلے اُتے عمل کرن دا پابند نہیں ہوئے گا ، عدالت توں فیر وفاقی حکومت نوں21 ارب فنڈز جاری کرن دا حکم دتا گیا، سپریم کورٹ نے فیر اسٹیٹ بینک نوں رقم جاری کرن دی ہدایت کیتی سی ۔ اعظم نذیر تارڑ نے آکھیا کہ ایس صورتحال وچ قومی اسمبلی قائمہ کمیٹی برائے خزانہ نے نوٹس لئیا ، قائمہ کمیٹی برائے خزانہ نے میری وی رائے لئی سی، اک چیز کلیئر اے فیڈرل کنسوڈیلٹی فنڈز جاری کرنا ایوان دا اختیار اے، ایس کیس وچ عدالتی حکم سن، ایوان 2 وار کلیئریٹی دے نال اپنا موقف دے چکیا سی، ایوان اکثریتی رائے تے قرارداد منظور کر چکیا سی، فنڈزدااجرا ایوان دااختیار اے۔