آئین توں انحراف کر کے فنڈز جاری نہیں کر سکدے، اسحاق ڈار

اسلام آباد( پنجابی میڈیا گروپ)وفاقی وزیر خزانہ اسحاق ڈار نے آکھیا اے کہ عدالتی حکم اپنی جگہ لیکن آئین توں انحراف کر کے فنڈز جاری نہیں کر سکدے۔قومی اسمبلی اجلاس نال خطاب کردیاں ہویاں وفاقی وزیر خزانہ دا کہنا سی کہ اگر63 نوں ری رائٹ نہ کیتا جاندا تے پورے ملک وچ الیکشن اک ویلے ہُندے، 2اسمبلیاں دی تحلیل نال ساریاں خرابیاں جنم لئیا، 2اسمبلیاں تحلیل نہ ہُندیاں تے اینہیاں خرابیاں نہ ہُندیاں۔اوہناں نے آکھیا کہ الیکشن کمیشن نے 2اسمبلیاں دے الیکشن لئی14.4 ارب وَدھ خرچہ منگیا گئیا، الیکشن کمیشن ولوںعام الیکشن لئی54 ارب دا مطالبہ سی، الیکشن کمیشن نال گل بات کر کے 47.4 ارب خرچہ طے ہوئیا سی۔اسحاق ڈار نے آکھیا کہ2 اسمبلیاں توڑ کے ملک وچ افراتفری پھیلان دی کوشش کیتی گئی، اگر کورٹ دا آرڈر اے تے پروسیجر دے بغیر نہیں ہو سکدا، اسیں آرٹیکل 81ای دا سہارا لئیا تے معاملے نوں کابینہ لے گئے۔اوہناں نے آکھیا کہ وفاقی حکومت کہہ رہی اے کہ اسیں ایس فیصلے نوں من دے ہی نہیں، کابینہ نے آکھیا فیصلہ 4 ، 3 دا اے جس نوں من دے ہاں، عدالتی حکم وچ آکھیا گیا کہ سٹیٹ بینک رقم جاری کرے، آئین وچ اینج دا کدھرے سسٹم نہیں کہ سٹیٹ بینک آپئی پیسے جاری کر دیوے ۔وفاقی وزیر خزانہ نے آکھیا کہ عدالتی حکم اپنی جگہ لیکن آئین توں انحراف کر کے فنڈز جاری نہیں کر سکدے۔