سپریم کورٹ دا کم پنچایت لانا نہیں، آئین دے مطابق فیصلے دینا اے:وزیراعظم

اسلام آباد(پنجابی میڈیاگروپ)وزیر اعظم شہباز شریف نے آکھیا اے کہ ہر طرح دے حربے استعمال کر کے ملک وچ انتشار دے سارے مواقع پیدا کیتے گئے، افواج پاکستان دی لیڈر شپ نوں وی معاف نہیں کیتا گیا، پی ٹی آئی دے ایجنٹاں نے اوہ کردار ادا کیتا جیہڑادشمن وی نہیں کر دا۔اتحادی جماعتاں دے مشاورتی اجلاس دے بعد گل بات کردیاں ہویاں وزیر اعظم شہباز شریف نے آکھیا کہ اپنی مخلوط حکومت دے سربراہواں نوں دل دیاں گہرائیاںنال جی آیاں نوں کہندا ہاں، اج اسیں فیر مل بیٹھے ہاں، ایس ویلے دے معاملات، چیلنج، صورتحال اُتے گل بات ہوئی، قومی اسمبلی تے جوائنٹ ہائوس نے چیلنجاں نوں ڈیل کیتا، آئینی تے قنونی اقدام کیتے گئے، اجے وی صورتحال بڑی چیلنجنگ اے۔وزیر اعظم نے آکھیا کہ اج وی مَن دے ہاں فیصلہ4،3 دا اے، سپریم کورٹ 3 رکنی بینچ نال معاملات اگے لے کے جانا چاہندی اے، کل ایس ہی بینچ نے الیکشن فنڈز دے حوالے نال جواب منگیا اے، پہلاں وی سپریم کورٹ دے فیصلیاں نوں پارلیمان نے ڈیل کیتا، ساڈا فرض بن دا اے پارلیمان نے جیہڑے فیصلے دتے اوہناں دا احترام کرن، پنچائیت سپریم کورٹ دا کم نہیں، قنون تے آئین دے مطابق فیصلے دینا اوہناں دا کم اے۔شہباز شریف نے آکھیا کہ 13اگست نوں پارلیمان دی مدت ختم ہُندی اے، الیکشن دی تریخ نومبر وچ بندی اے ، ملک وچ چیلنجز نیں، پی ٹی آئی نے چیلنجاں نوں حل کرن دی تجویز نہیں دتی، وزیراں نوںآکھیا گیا آئی ایم ایف نوں انکار کر دین، ڈھٹائی تے بے شرمی نال یوٹرن لئیا گیا، ایہ وی آکھیا گیا امریکا نے سازش نہیں کیتی، سازش پاکستان وچ ہوئی، خارجہ معاملات نوں ٹھیک کرن لئی اسیں پورا زور لایا۔اوہناں نے آکھیا کہ معاشرے وچ وَنڈ کیتی گئی تے زہر گھولیا گیا، سارے معاملات ساڈے سامنے نیں، ساڈے سامنے جیہڑ ے معاملات نیں پارلیمان اپنا فیصلہ دے چکی، جیہڑے معاملات ہُن نیں اوہناں دا فیصلہ وی پارلیمان نے کرنا اے، ساہنوں گل بات دا دروازہ بند نہیں کرنا چاہیدا، پارلیمانی کمیٹی ایس معاملے وچ گنجائش پیدا کر سکدی اے،اسیں انا نوں اپنا مسئلہ نہیں بنایا، کَدی اوہناں نے مناسب نہیں جانیا کہ اپنی انا نوں تھلے لے آئے۔