وفاقی بجٹ:پنشن وچ ساڑھے17،تنخواہواں وچ35فیصد تک ودھان دااعلان

اسلام آباد(پنجابی میڈیا گروپ)وفاقی وزیر خزانہ اسحاق ڈار نے مالی سال 24-2023لئی6924ارب روپے دے خسارے دے نال 14 ہزار 460 ارب روپے دا بجٹ قومی اسمبلی وچ پیش کر دتا، جس وچ گریڈ 1 توں 16 تک دے سرکاری ملازماں لئی 35، گریڈ 17 توں 22 دے ملازماں لئی 30 فیصد جدکہ پنشن وچ ساڑھے 17 فیصد ودھا دا اعلان کیتا گیا اے، بجٹ وچ دفاع لئی 1804 ارب روپے رکھے گئے نیں۔بجٹ اجلاس نال خطاب کردیاں ہویاں وزیر خزانہ نے آکھیا اے کہ قرضیاں وچ ودھا پاروں سود دی ادائیگی وچ بے تحاشہ ودھا ہویا، پچھلے دور وچ گردشی قرضے اندر سالانہ 129 ارب روپے ودھا ہویا، موجودہ حکومت نے خسارے نوں گھٹ کرن لئی کفایت شعاری دی پالیسی اپنائی اے، حکومت نے آئی ایم ایف پروگرام دے نویں جائزے دیاں ساریاںشرطاں نوں پورا کر دتا اے، ساڈی کوشش اے کہ چھیتی توں چھیتی سٹاف لیول معاہدہ مکمل ہو جائے۔وزیر خزانہ نے اکھیا اے کہ گریڈ اک توں 16 تک دے سرکاری ملازماں دیاں تنخواہواں وچ 35 فیصد، گریڈ 17 توں 22 تک ملازماں دیاں تنخواہواں وچ 30 فیصد ایڈہاک ریلیف دتا جائے گا، پنشن وچ ساڑھے 17 فیصدودھا کیتا جائے گا، اسلام آبادوچ گھٹ توںگھٹ اجرت نوں 25 ہزار توں ودھا کے 32 ہزار روپے کیتا جا رہیا اے، ای اوبی آئی دی پنشن نوں ساڑھے 8 ہزار توں 10 ہزار کیتا جا رہیا اے۔اسحاق ڈار نے آکھیا کہ حکومت نوں عوام دیاں مشکلاں دا اندازہ اے،ساریاں بیرونی ادائیگیاں بروقت کیتیاںجا رہیاں نیں، موجودہ حکومت دے بروقت اقدام نال تجارتی خسارے وچ 77 فیصد کمی آ چکی اے، بجلی دی پیداوار تے ترسیل دے نظام وچ بہتری لئی 107 ارب خرچ کیتے جان گے، تجارتی خسارہ گھٹ ہوکے 26 ارب ڈالر رہ جائے گا، ایچ ای سی لئی جاری اخراجات وچ 65 ارب، ترقیاتی اخراجات دی مد وچ 70 ارب مختص کیتے نیں۔وفاقی وزیر خزانہ نے آکھیا کہ موجودہ حکومت دے اقدامات نال زرمبادلہ دے ذخائر وچ گراوٹ اُتے قابو پایا، پاکستان انڈومنٹ فنڈ لئی بجٹ وچ 5 ارب روپے رکھے جا رہے نیں، بے نظیر انکم سپورٹ پروگرام دے بجٹ وچ25 فیصد ودھا کیتا گیا اے، 1 ورھے وچ تجارتی خسارہ 22 ارب ڈالر گھٹ کیتا گئیا، سکول، کالج تے پروفیشنل کھیڈاں وچ ترقی لئی 5 ارب روپے رکھے گئے نیں ۔اوہناں نے آکھا کہ بجٹ وچ عورتاں نوں بااختیار بنان لئی5 ارب روپے مختص کیتے نیں، یوٹیلٹی سٹوراں اُتے گھٹ قیمت شیواں دی فراہمی لئی 26 ارب روپے رکھے نیں، پٹرول 20، ڈیزل 35 روپے گھٹ کیتا جس نال مہنگائی گھٹ ہو گی، 12ارب ڈالر دے قرضیاں دیاں ادائیگیاں کیتیاں جا چکیاں نیں، صنعتی شعبے اُتے اگلے سال لئی کوئی نوا ٹیکس نہیں لایا، ایہ الیکشن بجٹ نہیں اے، ایہ الیکشن بجٹ ہُنداتے اوس دے خدوخال کجھ ہور ہندے، بجٹ وچ ساڈا کوئی سیاسی ابجیکٹو نہیں اے۔وزیر خزانہ نے آکھیا زرعی شعبے لئی 2 ہزار ارب روپے دا کسان پیکیج دتا، 50 ہزار زرعی ٹیوب ویل نوں سولراُتے منتقل کرن لئی 30 ارب مختص کیتے نیں، سیلاب دے باوجود زراعت وچ ڈیڑھ فیصد گروتھ ملی اے، زرمبادلہ ذخائر 9.34 ارب ڈالر نیں، وزیراعظم یوتھ پروگرام فار سمال لونز لئی 10 ارب روپے مختص کیتے نیں، ترقی دا ہدف 3.5 فیصد رکھیا اے، بزنس، ایگری کلچر سکیماں متعارف کرائیاں جا رہیاں نیں، چھوٹے قرضیاںنوں جاری رکھیا جائے گا، زرعی قرضیاں نوں ودھا کے 2250 ارب روپے کیتاجا رہیا اے ۔اسحاق ڈار نے آکھیا زرعی مشینری دی درآمد اُتے سارے ٹیکس ختم کر دتے گئے، معیاری بیجاں دی درآمد اُتے سارے ٹیکس تے کسٹم ڈیوٹی ختم کردتی اے، فارن کرنسی آٹ فلو لئی نان فائلر اُتے ود ہولڈنگ ٹیکس دی شرح 10 فیصد کردتا گیا اے،ایس مالی سال ایف بی آر دے محاصل 72 سو ارب روپے رہن دا امکان اے جنہاں وچ صوبیاں دا حصہ 4 ہزار129 ارب روپے ہوئے گا، وزیر اعظم سکلز پروگرام تحت نوجواناںدی تربیت لئی 5 ارب روپے مختص کیتے نیں۔اوہناں نے آکھیا کہ کاروباری عورتاں لئی ٹیکس دی شرح وچ وی چھوٹ دتی گئی اے، حکومت نے فیصلہ کیتا اے کہ صنعتی شعبے اُتے کوئی ٹیکس عائد نہیں کیتا جائے گا، ملک دے معاشی حالات ہُن بہتری ول گامزن نیں، حکومت نے ملکی صورتحال نوں مدنظر رکھدیاں ہویاں موجودہ بجٹ دتا، بجٹ تجویز وچ ساڈا فوکس ترقی دے محرکات اُتے اے، وفاقی حکومت دا نان ٹیکس ریونیو 1618 ارب روپے ہون دی توقع اے، ایہ ٹیکس برانڈڈ ٹیکسٹائل اینڈ لیدردے قیمتی ملبوسات اُتے لئیا جائے گا۔وزیر خزانہ نے آکھیا کہ کل اخراجات دا تخمینہ 11 ہزار 90 ارب روپے اے، وفاق دے محاصل 4 ہزار 689 ارب روپے ہون گے، ایگرو انڈسٹری نوں رعایتی قرضیاں دی فراہمی لئی 5 ارب روپے مختص کیتے گئے نیں، کھاد اُتے سبسڈی لئی 6 ارب روپے مختص کیتے گئے نیں، ٹیکسٹائل، لیدر، مصنوعات دے ٹیئرون ریٹیلرز اُتے جی ایس ٹی دی شرح 12توں 15 فیصد کر دتی اے، فارن کرنسی آٹ فلو لئی فائلراُتے ود ہولڈنگ ٹیکس دی شرح 1توں ودھا کے 5 فیصد کیتی جا رہی اے۔اسحاق ڈار نے آکھیا اے کہ سول حکومت دے مجموعی اخراجات 553 ارب، پنشن اُتے 654 ارب خرچ ہون گے، دفاع اُتے کم و بیش 1510 ارب روپے خرچ ہون گے، افراط زر کی شرح 21 فیصد تک ہوئے گی۔
٭٭٭٭٭٭٭٭٭٭٭٭٭٭٭٭٭٭٭٭٭٭