جعلی کاغذ لہراکے آکھیا گیا سائفرآیا اے،وزیراعظم

اسلام آباد(پنجابی میڈیا گروپ)وزیراعظم شہباز شریف نے اکھیا اے کہ جعلی کاغذ لہرا کے آکھیا جاندا رہیا کہ سائفر آیا اے تے ایہ اک امپورٹڈ حکومت اے ،حقائق نے ایس جھوٹے پروپیگنڈے نوں زمین بوس کردتا اے۔اسلام آبادتے راولپنڈی دے مختلف ترقیاتی منصوبیاں دے افتتاح اُتے وزیراعظم شہباز شریف نے آکھیا کہ چیئرمین پی ٹی آئی نے پاکستان دے وقارنوں مٹی وچ ملان دی کوشش کیتی، لوکاں دی جھوٹی ذہن سازی کیتی جا رہی سی، قوم نوں آکھیا گیا میری حکومت امریکا نے ہٹوائی اے۔وزیراعظم نے آکھیا کہ روس توں1لکھ ٹن خام تیل آیا اے، روسی تیل دا پہلا جہاز کراچی آچکیا اے، اوہناں نے روس توں اک دمڑی دی شے وی نہیں منگوائی سی، لوگ پچھدے نیں روسی تیل دی کیہ خصوصیت اے، روس دے تیل دی قیمت عالمی تیل دی قیمت توں گھٹ اے، روس دا تیل عالمی منڈی توں کم از کم 15ڈالر فی بیرل سستا اے۔اوہناں نے آکھیا کہ پاکستان نوں ایس ویلے زرمبادلہ دی لوڑ اے، عوامی بجٹ دین اُتے اسحاق ڈارتے اوہناں دی ٹیم نوں مبارکباد پیش کردا ہاں، جَد تک کسی ملک وچ سیاسی استحکام نہیں ہُندا معاشی استحکام نہیں آسکدا، جَد کسی ملک وچ دن رات جھوٹا پروپیگنڈا ہوئے گاتے کون اوتھے سرمایہ کاری کرے گا؟پچھلی حکومت نے پاکستان دی معیشت دا بیڑا غرق کردتا۔وزیراعظم دا کہنا سی کہ جیہڑا آئی ایم ایف نال معاہدہ کرکے توڑیا گیا ساہنوں اوس دا بوہت زیادہ نقصان ہوا، پوری کوشش کر رہے ہاں کہ آئی ایم ایف نال معاہدہ ہو جائے، آئی ایم ایف دیاں ساریاں شرطاں پوری کرلئیاں نیں، اسیں آئی ایم ایف نال معاہدہ کرن وچ کامیاب ہو جاواں گے۔شہباز شریف نے آکھیا کہ اگر میرے خلاف وی کوئی کرپشن دا ثبوت اے تے لے کے آون، جھوٹے الزام لانا مناسب نہیں اے، چیئرمین پی ٹی آئی نے پوری اپوزیشن نوں دیوارنال لا دتا سی ، پونے4ورھے اوہناں نوں کسی دے خلاف کرپشن دا ثبوت نہیں ملیا، اگر کرپشن دے ثبوت نہیں نیں تے منہ بند رکھیا جائے۔اوہناں نے آکھیا کہ کسی وی ٹیم دا کپتان اک ہُندا اے، جَد تک 10کھیڈاری کپتان دے نال محنت نہ کرن ٹیم کامیاب نہیں ہوسکدی، کسی وی ٹیم دی کامیابی ٹیم ورک اے،پچھلی حکومت نے ترکیہ نال تعلقات خراب کیتے، ساہنوں ارباں ڈالر دی کنک امپورٹ کرنی پئی، پچھلی حکومت وچ کنک دی مقدار گھٹ ہوگئی سی۔وزیراعظم دا ہور کہنا سی کہ نوجوان بالاں نوں قرضے دین لئی ارباں روپے رکھے گئے نیں، دیہاتاں وچ زرعی قرضے فراہم کیتے جان گے، نوجوان نسل ہی پاکستان دی کامیابی دی ضمانت اے، چیئرمین پی ٹی آئی کہندے سن ایہ لیپ ٹاپس نہیں رشوت اے، چیئرمین پی ٹی آئی نے پچھلے دور وچ نوجواناں نوں گمراہ کیتا، نوجواناں نوں1لکھ لیپ ٹاپ دین دا پروگرام دوبارہ شروع کر رہے ہاں۔