آئینی اختیارنوںآئینی ترمیم ذریعے ہی تبدیل کیتا جا سکدااے،چیف جسٹس

اسلام آباد(پنجابی میڈیا گروپ)چیف جسٹس پاکستان نے آکھیا اے کہ آرٹیکل184(3)وچ اپیل دے حق لئی آئینی ترمیم نوں جی آیاں نوں آکھاں گے تے آئینی اختیارنوں آئینی ترمیم ذریعے ہی تبدیل کیتا جا سکدا اے۔چیف جسٹس دی سربراہی وچ سپریم کورٹ دے3 رکنی بنچ نے ریویو اینڈ ججمنٹ ایکٹ خلاف درخواستاں اُتے سماعت کیتی ۔پی ٹی آئی وکیل بیرسٹر علی ظفر نے دلائل دیندیاں ہویاں آکھیا کہ فیصلہ وچ آکھیاگیا عدالت نوں اپنا پرانا فیصلہ ری اوپن کرن وچ بوہت ہچکچاہٹ تے احتیاط وَرتنی چاہیدی اے، فیصلہ وچ سپریم کورٹ دے فیصلیاں دے حتمی ہون دی اہمیت اُتے زوردتا گیااے۔چیف جسٹس نے آکھیا کہ تہاڈے ولوںہُن تک3پوائنٹ چُکے گئے نیں، فیصلے وچ وزڈم اے، اوہ قنونی عمل نوں حتمی بنان دی گل کررہے نیں۔چیف جسٹس نے آکھیا کہ بھارت وچ حق سماعت نہ ملے تے نظرثانی درخواست دائر ہندی اے ، ساڈے کول فیصلہ غیر قنونی ہوئے تے نظرثانی ہوجاندی اے،اسیں ایہ ویکھ رہے ہاں کہ کیا پارلیمنٹ نظرثانی قنون نوں وسیع کرسکدی اے؟چیف جسٹس عمر عطا بندیال نے آکھیا کہ آئین وچ نظرثانی دے دائرہ اختیار نوںبالکل واضح لکھیا گیا اے، بیرسٹر علی ظفر نے آکھیا کہ میرا کیس وی ایہی اے کہ ریویو آف ججمنٹ اینڈ آرڈر ایکٹ خلاف آئین اے، جس اُتے جسٹس منیب اختر نے آکھیا کہ فوجداری ریویو وچ صرف نقص دور کیتا جاندا اے جدکہ سول وچ سکوپ وڈا اے۔چیف جسٹس نے آکھیا کہ نظرثانی دے آئینی تقاضے نیں مگر اوس نوں اپیل وچ نہیں بدلیاجاسکدا،اگر نظرثانی وچ اپیل دا حق دینا اے تے آئینی ترمیم درکار ہوئے گی، نظرثانی کیس وچ صرف نقائص دا جائزہ لئیا جاندا اے، نویں شواہد وی پیش نہیں ہوسکدے۔وکیل پی ٹی آئی علی ظفر نے آکھیا کہ آئین کہندا اے شیڈول فور دے مطابق ہی قنون بن سکدا اے، پارلیمنٹ ہائیکورٹ بارے قنون بناسکدی اے مگر سپریم کورٹ بارے نہیں، آئین وچ سپریم کورٹ تے پارلیمنٹ نوں وِکھ وِکھ رکھیا گیا اے۔اوہناں نے ہورآکھیا کہ نظرثانی وچ اپیل دا حق دینا آرٹیکل184/3دے اختیار گھٹ کرنا اے۔چیف جسٹس نے آکھیا کہ تہاڈے مطابق اوہ دراصل184(3)دے اثرنوں گھٹ کررہے نیں، تُسی کہہ رہے او 184(3)دا دائرہ گھٹ کرن موسٹ ویلکم لیکن آئینی ترمیم نال کرن؟جس اُتے بیرسٹر علی ظفر نے آکھیا کہ جی اسیں ایہی کہہ رہے ہاں، چیف جسٹس نے آکھیا کہ نظرثانی وچ تہانوں ویکھانا ہوئے گا کیہڑا نقص فیصلہ وچ موجود اے۔