یونان وچ کشتی حادثہ: وزیراعظم دا اج یوم سوگ دااعلان

لہور(پنجابی میڈیا گروپ)وزیراعظم شہبازشریف نے یونان وچ کشتی ڈوبن دے حادثے وچ پاکستانیاں دی ہلاکت اُتے اج (پیر)والے دن یوم سوگ دا اعلان کردتا جدکہ واقعے دی تحقیقات لئی 4 رکنی اعلیٰ سطحی کمیٹی وی تشکیل دے دتی گئی ۔ اج پیر والے دن یوم سوگ اُتے قومی جھنڈا سرنگوں رہے گا تے جاں بحق ہون والیاں لئی خصوصی دعا کیتی جائے گی ۔وزیراعظم نے واقعے دی تحقیقات لئی 4رکنی اعلی سطح کمیٹی وی تشکیل دے دتی اے۔نیشنل پلس بیورو دے ڈائریکٹر جنرل احسان صادق کمیٹی دے چیئرمین ہون گے جدکہ وزارت خارجہ دے ایڈیشنل سیکرٹری (افریقہ)جاوید احمد عمرانی ،آزادجموں وکشمیر پونچھ ریجن دے ڈی آئی جی سردار ظہیراحمد تے وزارت داخلہ دے جوائنٹ سیکرٹری (ایف آئی اے)فیصل نصیر وی کمیٹی وچ شامل ہوون گے۔ کمیٹی یونان وچ کشتی ڈوبن دے سارے حقائق جمع کرے گی،انسانی سمگلنگ دے پہلوواںدی تحقیق ہوئے گی تے ذمہ داراں دا تعین کیتا جائے گا ،عالمی سطح اُتے ایس مسئلے دے حل لئی تعاون تے اشتراک عمل دی تجویز دتی جائے گی ۔