معاشی بحالی لئی سول وعسکری قیادت دا تفاق

اسلام آباد(پنجابی میڈیا گروپ)پاکستان دی معاشی بحالی لئی قومی پلان تیارکر لئیا گیا،سول و عسکری قیادت نے مل کے ساریاںرکاوٹاں دور کرن اُتے اتفاق کیتا،ایس سلسلہ وچ غیر ملکی سرمایہ کاری دے رستے وچ رکاوٹاں دور کرن لئی سپیشل انویسٹمنٹ فسیلیٹیشن کونسل وی قائم کردتی گئی۔وزیراعظم شہبازشریف دی زیرصدارت کونسل دا پہلا اجلاس وی ہویا، جس وچ آرمی چیف، وزرااعلی، وفاقی وصوبائی وزرا، اعلی سرکاری حکام نے رَلت کیتی،کونسل دے پہلے اجلاس دااعلامیہ جاری کردتا گیا جس دے مطابق قومی حکمت عملی نال ملک نوں درپیش موجودہ معاشی مسائل تے بحراناں توں نجات دلانا، غیر ملکی سرمایہ کاری دی راہ ہموار کرنا اے۔منصوبے تحت زراعت، لائیو سٹاک، معدنیات، کان کنی دے شعبیاں وچ پاکستان دی اصل صلاحیت توں استفادہ کیتا جائے گا، انفارمیشن ٹیکنالوجی، توانائی تے زرعی پیداوار ورگے شعبیاں وچ اصل صلاحیت توں استفادہ کیتا جائے گا، اینہاں شعبیاں ذریعے مقامی پیداواری صلاحیت تے دُوست ملکاں نال سرمایہ کاری ودھائے جائے گی۔اعلامیہ دے مطابق منصوبے تحت اک حکومت تے اجتماعی حکومت دے تصور نوں فروغ دتا جائے گا تاکہ سرمایہ کاری تے کاروباری سرگرمیاں وچ حائل ساریاں رکاوٹاں دور کیتیاںجان، منصوبے اُتے عملدرآمد تیز کرن لئی سپیشل انویسٹمنٹ فسیلیٹیشن کونسل بنادتی گئی اے،کونسل سرمایہ کاراںتے سرمایہ کاری وچ سہولت لئی سنگل ونڈو دی سہولت دا کردار ادا کرے گی۔