قومی اسمبلی نے14ہزار480 ارب روپے دے وفاقی بجٹ دی منظوری دے دتی

اسلام آباد(پنجابی میڈیا گروپ)قومی اسمبلی نے آئی ایم ایف دے مطالبے اُتے ٹیکس دا ہدف215ارب روپے ودھا کے94کھرب15روپے کرن دے بعد آئندہ مالی سال24ـ2023 لئی14ہزار480ارب روپے دے وفاقی بجٹ دی کثرت رائے نال منظوری دے دتی۔اتوار نوں قومی اسمبلی وچ فنانس بل دی منظوری لئی اسپیکرراجا پرویزاشرف دی زیرصدارت اجلاس ہویا۔اسپیکر قومی اسمبلی راجہ پرویز اشرف نے یکے بعد دیگرے بل دیاں ساریاں شقاںنوںایوان وچ منظوری لئی پیش کیتا جس وچ مولانا عبدالاکبر چترالی، سائرہ بانو، نثار چیمہ، زہرہ ودود فاطمی، نواب شیر وسیر، آسیہ عظیم تے ہوراں مختلف شقاں اُتے ترامیم پیش کیتیاں جنہاں نوں ایوان نے کثرت رائے نال مسترد کردتا جدکہ مولانا عبدالاکبر چترالی دی اک ترمیم ایوان نے بل وچ شامل کرن دی منظوری دے دتی۔ایس طرح بل وچ ایم کیو ایم رکن صلاح الدین دی ترمیم نوں وی ایوان نے مسترد کردتا۔فنانس بل وچ کُل9ترمیماں کیتیاں گئیاں نیں، اوہناں وچ8ترمیماں حکومت،اک اپوزیشن ولوں شامل کیتی گئی اے۔ٹیکس وصولیاں داہدف9ہزار200توں وَدھ کے9ہزار415ارب مقررکردتا گیا اے،پنشن ادائیگی761ارب توں ودھا کے801ارب کردتی گئی،ایس دے علاوہ این ایف سی تحت صوبیاں نوں5ہزار276ارب دی بجائے5ہزار390ارب ملن گے۔جماعت اسلامی نال تعلق رکھن والے اپوزیشن رکن قومی اسمبلی مولانا عبدالاکبر چترالی نے فنانس بل اسلامی نظریاتی کونسل نوں اسلامی پیمانے اُتے جانچن لئی گھلن دا مطالبہ کییتا لیکن عبدالاکبر چترالی دے سوا سارے حکومتی واپوزیشن اراکان قومی اسمبلی نے فنانس بل وچ سود شامل ہون پاروں ایس اُتے اسلامی نظریاتی کونسل دی رائے لین دی مخالفت کردتی۔دریں اثنا مولانا عبد الاکبر چترالی ولوں پیش کیتی گئی ترمیم منظور کرلئی گئی جس تحت چیئرمین قائمہ کمیٹی نوں1200سی سی گڈی استعمال کرن دااختیار ہوئے گا۔خیال رہے کہ ایس توں پہلاں1300سی سی توں1600سی سی گڈی استعمال کرن دی اجازت سی۔دریں اثناوزیرخزانہ نے پٹرولیم ڈیولپمنٹ لیوی آرڈیننس وچ ترمیم پیش کردتی جیہڑی کہ قومی اسمبلی نے کثرت رائے نال ترمیم منظور کرلئی ۔ترمیم تحت پیٹرولیم ڈیولپمنٹ لیوی دی حد50روپے فی لیٹرتوںودھا کے60روپے فی لیٹرکردتی گئی۔