چیئرمین پی ٹی آئی دی فیملی، وکیل تے ڈاکٹر دی جیل وچ ملاقات لئی درخواست دائر

اسلام آباد( پنجابی میڈیا گروپ)چیئرمین پی ٹی آئی دی فیملی، وکیل تے ذاتی ڈاکٹر نال جیل وچ ملاقات دی اجازت لئی انٹراکورٹ اپیل اسلام آباد ہائی کورٹ وچ دائر کر دتی گئی۔چیئرمین پی ٹی آئی دے وکیل شیر افضل مروت نے اسلام آباد ہائی کورٹ وچ درخواست دائر کیتی، درخواست وچ اسلام آباد ہائی کورٹ دے سنگل بنچ دا25 ستمبردا حکم نامہ چیلنج کیتا گیا اے۔درخواست وچ موقف اختیار کیتا گیا اے کہ اسلام آباد ہائی کورٹ نے 25 ستمبر نوں چیئرمین پی ٹی آئی نوں اٹک جیل توں اڈیالہ جیل منتقل کرن دا حکم دتا، عدالت نے چیئرمین پی ٹی آئی نوں بہتر کلاس دیاں سہولتاں فراہم کرن دا وی حکم دتا، لیکن اسلام آباد ہائی کورٹ نے چیئرمین پی ٹی آئی دی فیملی، وکیل تے معالج نال ملاقات دی استدعااُتے کوئی حکم جاری نہیں کیتا۔درخواست وچ ہور آکھیاگیا کہ چیئرمین پی ٹی آئی دی گھر والی تے بہناں دی ملاقات لئی سوموار دادن مقرر کیتا گیا اے، چیئرمین پی ٹی آئی دی وکیلاں نال ملاقات لئی جمعرات دا دن مقرر کیتا گیا اے، جیل انتظامیہ ولوں ہفتے وچ صرف 2 دن ملاقات دی اجازت دتی جاندی اے ایس دے علاوہ چیئرمین پی ٹی آئی نال ملاقات وچ صرف 4 وکیلاں نوں ملن دی اجازت دتی جاندی اے ۔عدالت توں استدعا کیتی گئی اے کہ سنگل بنچ دے 25 ستمبر دے حکم نامے وچ ترمیم کر کے چیئرمین پی ٹی آئی نالملاقات دی اجازت دتی جائے، درخواست وچ سیکرٹری داخلہ، چیف کمشنر اسلام آباد تے سپرنٹنڈنٹ اڈیالہ جیل نوں وی فریق بنایا گیا اے۔